نووسینگەی سوودانی سەبارەت به کۆبوونەوەی ئەمڕۆی ئەنجومەنی وەزیرانی عێراق و پرسه هەڵپەسێردراوەکانی نێوان هەولێر و بەغدا راگەیەندراوێکی بڵاوکردەوه.
نووسینگەی سوودانی دەڵێت: وەک پابەندبوونێک لە حکومەتەوە بۆ جێبەجێکردنی بڕگەکانی یاسای بودجەی گشتی فیدراڵی و بڕیارەکانی دادگای فیدراڵی، سەبارەت بە پابەندبوونە داراییەکانی نێوان حکومەتی فیدراڵ و حکومەتی هەرێمی کوردستان، ئەنجومەنی وەزیران تاوتوێی دوو رەشنووسی کرد، کە یەکەمیان لەلایەن لایەنە پەیوەندیدارەکانی فیدراڵییەوە پێشکەشکراوە و دووەمیان لەلایەن حکومەتی هەرێمی کوردستانەوە و تایبەتن بە ڕادەستکردنی داهاتی نەوتی و نانەوتی هەرێم و دۆسیەی مووچەی فەرمانبەران و خۆجێیکردنیانەوە.
نووسینگەی سوودانی رایگەیاند: دوابەدوای ئەمە سەرۆکی ئەنجومەنی وەزیران محەمەد شەیاع سوودانی، فەرمانی پێکهێنانی لیژنەیەکی کرد، بە سەرۆکایەتی جێگری سەرۆکی ئەنجومەنی وەزیران و وەزیری پلاندانان و ئەندامێتی وەزیرانی ئاوەدانکردنەوە و نیشتەجێبوون و خوێندنی باڵا و داد و تەندروستی، بۆ تاوتوێکردنی ئەو دوو رەشنووسه لەگەڵ سەرجەم لایەنە پەیوەندیدارەکان لە حکومەتی فیدراڵ و حکومەتی هەرێم، بە مەرجێک لیژنەکە راسپاردەکانی پێشکەش بە ئەنجومەنی وەزیران بکات بۆ ئەوەی لە زووترین کاتدا بڕیاری گونجاو بدرێت.”