سەرچاوەیەکی ئەمنی رایگەیاند کە ژمارەی قوربانیانی تەقینەوەکەی ناو بارەگایەکی حەشدی شەعبی لە دەوروبەری پایتەختی بەغدا بەرزبووەتەوە بۆ سێ کوژراو، دوای ئەوەی لە ئاماری سەرەتاییدا یەک کوژراو و دوو بریندار بوو.
سەرچاوەکە بە شەفەق نیوزی راگەیاند: تەقینەوەکە لەناو بارەگایەکی سەربە حەشدی شەعبی روویداوە کە بریتی بووە لە کۆگایەکی پاشماوەی جەنگ.
ئاماژەی بەوەدا کە “تەقینەوەکە لە کاتی پووچەڵکردنەوەی پاشماوە جەنگییەکاندا روویداوە و بەپێی نوێترین ئامار بووەتە هۆی کوژرانی سێ کەس و زیان گەیشتن بە حەوت ماڵ.
ئەمڕۆ تەقینەوەیەک لەناو یەکێک لە بارەگاکانی حەشدی شەعبی کە تەنیشت کارگەی غاز بوو لە نزیک شاری بەسمایە، باشووری رۆژهەڵاتی بەغدا روویدا. لە بەیاننامەیەکی پێشووتردا، دەستەی حەشدی شەعبی ئەو ڕووداوەی وەک “ڕووداوێکی لەناکاو” وەسف کرد کە لە کاتی جێبەجێکردنی ئەرکێکی تەکنیکی لە ناوچەی جرف ئەلنەدافی بەغدا روویداوە.
دەستەکە روونیکردەوە کە تەقینەوەکە بەهۆی ماددە تەقێنەرەکانەوە بووە کە چەکدرانی داعشی تیرۆریست لەناو بارەگاکەدا بەجێیان هێشتووە و جەختی لەسەر ئەوە کردەوە کە کۆنترۆڵی رووداوەکەیان کردووە و رێوشوێنی پێویستیان گرتووەتەبەر و تیمەکانیان بەردەوامن لە پاککردنەوەی ناوچەکان لە پاشماوەی تیرۆر بۆ پاراستنی گیانی هاوڵاتیان.