محەمەد شیاع سوودانی، سەرۆک وەزیرانی عێراق ئاماژەی بە خواست و ئارەزووی خۆی کرد بۆ سەرۆکایەتیکردنی کابینەی داهاتووی عێراق. ئەو پێی وایە بەدەستهێنانی ویلایەتی دووەم تەنها ئارەزوویەکی کەسی نییە، بەڵکو شایستەیەکی هەڵبژاردنه، چونکە کوتلەی “ئاوەدانکردنەوە و گەشەپێدان” (الإعمار والتنمية) کە سەرۆکایەتی دەکات، زۆرترین دەنگی لە شەشەمین هەڵبژاردن بەدەستهێناوە.
سوودانی رایگەیاند کە لە هەموو هەڵبژاردنێکی پەرلەمانیدا ئەنجامەکان نەبوونەتە بڕیاردەر و حوکمڕان بۆ پێکهێنانی حکومەت و گوتی: “ئەمڕۆ هاوپەیمانی ئاوەدانکردنەوە و گەشەپێدان بەشێکی سەرەکییە لە پێکهاتەکانی چوارچێوەی هەماهەنگی و دوێنێش چوارچێوەکە کۆبووەوە و بڕیاری دا بە پێکهێنانی گەورەترین کوتلەی پەرلەمانی.”
گوتی: “چوارچێوەکە دەست دەکات بە گفتوگۆ لەگەڵ کوتلە سیاسییەکانی تر بۆ دامەزراندنی شایستە دەستوورییەکان و پێکهێنانی سەرۆکایەتییەکان، ئەمەش ئەو رێڕەوەیە کە ئێمە باوەڕمان پێیەتی.”
سوودانی درێژەی بە قسەکانیدا: “سەبارەت بە پرسی ویلایەتی دووەم، ئەوە تەنها ئارەزوویەکی کەسی نییە، بەڵکو ئامادەکارییە بۆ هەڵگرتنی بەرپرسیارێتی و تەواوکردنی ئەو پڕۆژەیەی کە دەستمان پێکردووە و ئەو دەستکەوتەی لەسەر زەوی بەدیهات، هەروەها بردنەوەیەکی شایستەیە بۆ ئەو کوتلەیەی کە پلەی یەکەمی لەم هەڵبژاردنەدا بەدەستهێنا کە کوتلەی ئاوەدانکردنەوە و گەشەپێدانە، لەگەڵ ئەو پڕۆژەیەش کە بۆ قۆناغی داهاتوو لەبەردەستماندایە.”
لەبارەی کاتی پێکهێنانی حکومەتی نوێی عێراق، سوودانی ئاماژەی بەوەدا کە “هەموو هێزە سیاسییەکان پەرۆشن بۆ پابەندبوون بە کاتە دەستوورییەکان و ئەنجامدانی ئەم هەڵبژاردنە بەو شێوەیەی کە رووی دا لە کەشێکی ئارام و جێگیر و بە شێوەیەکی روون و بێ کێشە و تا ئێستا هیچ سکاڵایەکی سوور لەسەریان نییە کە ئەمەش رێگە خۆش دەکات بۆ گەیشتن بە رێککەوتنێکی خێرا کە ببێتە هۆی پێکهێنانی حکومەت لە خێراترین کاتدا.”