ئەنجومەنی وەزیرانی عێراق له کۆبوونەوەی ئەمڕۆیدا گرێبەستی کڕینی سیستمەکانی بەرگریی ئاسمانی و تەواوکردنی پێداویستییەکانی ئەم سێکتەرە سەربازییەی پەسند کرد.
هەروەها تاوتێی ڕێکارەکانی دەسپێکردنەوەی جووڵەی فڕۆکەوانیی مەدەنی لە ئاسمانی عێراقدا کرد بەپێی مەرجەکانی ئاسایش و سەلامەتی.
نووسینگەی ڕاگەیاندنی سەرۆک وەزیرانی عێراق لە بەیاننامەیەکدا ڕایگەیاند: لە سێزدەیەمین کۆبوونەوەی ئاسایی ئەنجومەنی وەزیران بە سەرۆکایەتی محەمەد شیاع سوودانی، پەرەسەندنەکانی ناوچەکە و کاریگەرییەکانی بەردەوامیی جەنگ لەسەر بەرژەوەندییەکانی عێراق تاوتێکران.
بڕیارە سەربازی و ئەمنییەکان:
• بەرگریی ئاسمانی: ئەنجومەنی وەزیران ڕەزامەندی دەربڕی لەسەر گرێبەستی کڕینی سیستمەکانی بەرگری و دابینکردنی هەموو پێداویستییە گرنگەکان بۆ بەرزکردنەوەی توانای هێزەکانی بەرگریی ئاسمانی، ئەمەش لەسەر بنەمای پێشنیازەکانی وەزارەتی بەرگری.
• گەشتە ئاسمانییەکان: دوای وەستانی گەشتەکان بەهۆی جەنگ و بارودۆخی ناوچەکە، ئەنجومەن گوێی لە ڕاپۆرتێکی سەرۆکی دەسەڵاتی فڕۆکەوانیی مەدەنی گرت. بڕیاردرا هەماهەنگییەکی چڕ لە نێوان لایەنە مەدەنی و سەربازییەکاندا بکرێت بۆ هەڵسەنگاندنی دۆخی ئاسمان و فڕۆکەخانەکان، بە مەبەستی دەسپێکردنەوەی گەشتە مەدەنییەکان لە نزیکترین دەرفەتدا.
ئابووری و دارایی:
• داهات و خەرجی: جەختکرایەوە لەسەر زیادکردنی داهاتەکان و کەمکردنەوەی خەرجییەکان لە فەرمانگەکانی دەوڵەتدا. وەزارەتی دارایی ڕاسپێردرا وردبینی لە داتاکانی وەزارەتەکاندا بکات و ڕاپۆرتێک پێشکەش بە ئەنجومەنی وەزاری بۆ ئابووری بکات.
• سزادانی کەمتەرخەمەکان: بڕیاردرا ئەو لایەنانەی پابەند نەبوون بە گەڕاندنەوەی پشکی خەزێنە بۆ وەزارەتی دارایی یان داتاکانیان نەناردووە، ڕەوانەی لیژنەی لێکۆڵینەوە بکرێن بەپێی یاسای ئینزیباتی فەرمانبەران.
پڕۆژە خزمەتگوزارییەکان:
• ئاوی کەرخ: بەهۆی گرنگیی ئاوی خواردنەوە بۆ ژیانی هاووڵاتییان، ئەنجومەنی وەزیران پڕۆژەی دابینکردن و دانانی موەلیدەی کارەبای بۆ پڕۆژەی ئاوی کەرخ بە توانای (٢١) مێگاوات بەدەرکرد لە هەندێک بڕیاری پێشوو، بۆ ئەوەی پڕۆژەکە بەبێ گرفت بەردەوام بێت.