عەدنان فەیحان دلێمی، جێگری یەکەمی سەرۆکی ئەنجومەنی نوێنەران جەختی کردەوە کە چەندین یاسای گرنگ لەبەردەم پەرلەماندان، ئاماژەی بەوەش کرد یاساکانی نەوت و گاز و حەشدی شەعبی لە کارە هەرە لەپێشینەکانی ئەنجومەن دەبن.
فەیحان ڕایگەیاند: “دوای تەواوبوونی پێکهاتەی لێژنە پەرلەمانییەکان، دەست کراوە بە لێکۆڵینەوە لە یاساکان و پێشکەشکردنیان بە سەرۆکایەتیی پەرلەمان”. وتیشی: “لێژنەکان دەستیان کردووە بە ئامادەکردنی کۆمەڵێک یاسا و بۆ خوێندنەوەی یەکەم خراونەتە ڕوو، کۆمەڵێکی تریشمان لەبەردەستە کە وردە وردە بەپێی گرنگییەکەیان دەخرێنە ناو کارنامەی کۆبوونەوەکان”.
دووپاتیشی کردەوە کە “چەند یاسایەکی گرنگ دەبنە کارە لەپێشینەکانی هێزە سیاسییەکان و حکومەتی فیدراڵ بۆ ئەوەی بخرێنە بەرنامەی کار، لە سەرووی هەمووشیانەوە یاساکانی نەوت و گاز و حەشدی شەعبی”.