بەشی ڕۆشنبیری و ڕاگەیاندنی پ.د.ک، لە ئیمپایەر سینەما لە شاری هەولێر، ڕێوڕەسمی نمایشکردنی بەڵگەفیلمی “عەرعەر و سەگەکانی عەجاج”ـی ساز کرد.
ڕێوڕەسمەکە ئێوارەی چوارشەممە ٢٢ـی ٧ـی ٢٠٢٦، بە ئامادەبوونی د. سالار عوسمان، بەرپرسی بەشی ڕۆشنبیری و ڕاگەیاندن، ئومێد خۆشناو پارێزگاری هەولێر، د.سامان بەرزنجی وەزیری تەندروستی و بەرپرسانی حزبی و حکوومی و ژمارەیەکی بەرچاو لە نووسەران، ڕۆشنبیران، ئەدیبان و ڕۆژنامەڤانان بەڕێوەچوو.
د. سالار عوسمان، بەرپرسی بەشی ڕۆشنبیری و ڕاگەیاندنی پ.د.ک وتارێکی پێشکەش کرد و تێیدا ئاماژەی بەوە کرد کە:
مێژووی پڕ ژان و قوربانیدانمان پێویستی بە بەکولتوورکردنە، بۆیە هەوڵەکانی ڕۆژنامەنووس، محەممەد حاجی قادر بۆ بەرهەمهێنانی ئەم بەڵگەفیلمە، ئەرکێکی نیشتمانیی مەزنە و دەستخۆشی لێدەکەین. هەروەها خاتوو فەزیلە محەممەد، ئەو ئافرەتە مەزنەی نیشتمان، کە سیمبولی خۆڕاگریی ڕۆژە ڕەشەکانی ئەنفالە، پێمان دەڵێت: ئێمە بەناو تونێلی سەختی خەباتدا تێپەڕیوین و لەنێو قوربانییەکاندا ژیان دەچنینەوە.
با ناحەزان بزانن؛ هەرێمی کوردستان چیایەکی سەرکەشە و بە پیلانی بچووکی ئەوان ناهەژێت. ئێستا کاتیەتی بە یەکڕیزی، دەستباری خێر بگرین بۆ چارەسەری کێشەکان.
پاشان، محەممەد حاجی قادر، دەرهێنەری بەڵگەفیلمەکە، وێڕای خستنەڕووی هەنگاو و قۆناغەکانی ئامادەکردنی بەڵگە فیلمەکە، سوپاسی د. سالار عوسمان بەرپرسی بەشی ڕۆشنبیری و ڕاگەیاندنی پ.د.ک کرد کە هاوکار و هەماهەنگ بووە لە ڕێکخستنی ڕێوڕەسمەکە.
پاشان بەڵگەفیلمی “عەرعەر و سەگەکانی عەجاج” بۆ ئامادەبووان نمایش کرا، کە بووە جێی سەرنجی بینەران.
لە بڕگەیەکی دیکەی ڕێوڕەسمەکەدا، ڕێزلێنان و سوپاسنامەی بەشی ڕۆشنبیری و ڕاگەیاندنی پ.د.ک پێشکەش بە فەزیلە محەمەد، سکاڵاکاری دەستگیرکردنی عەجاج و محەممەد حاجی قادر، دەرهێنەری بەڵگە فیلم و ئەیاد کاکەیی، پارێزەری کەیسی ئەنفال کرا.
لە کۆتایی ڕێوڕەسمەکەشدا، خاتوو فەزیلە
محەممەد سکاڵاکاری دەستگیرکردنی عەجاج، وتەیەکی پێشکەش کرد سوپاسی ئامادەبووانی ڕێوڕەسمەکەی کرد.