بەگوێرەی زانیارییە سەرەتاییەکان، بەرەبەیانی ئەمڕۆ شەممە، درۆنێکی نەناسراو لە کاتی نزیکبوونەوەی لە ئاسمانی پاڵاوگەی بێجی (گەورەترین پاڵاوگەی عێراق)، لەلایەن هێزەکانی سوپای عێراقەوە تێبینی کراوە. دەستبەجێ هێزە ئەمنییەکان بە ڕەشاشی عەیار 23 ملیم تەقەیان لێکردووە و پێش ئەوەی بگاتە نێو دامەزراوەکە، خستوویانەتە خوارەوە.
سەرچاوەیەکی ئەمنی لە پارێزگای سەڵاحەدین ڕایگەیاند: “خستنەخوارەوەی درۆنەکە لە چوارچێوەی ئۆپراسیۆنەکانی دڵنیایی و پاراستنی دامەزراوە گرنگ و ستراتیژییەکانی وڵات بووە، کە لەو سنوورەدا هێزەکان لە ئامادەباشیدان.”
سەبارەت بە زیانەکان و ناسنامەی درۆنەکە، هەمان سەرچاوە ئاماژەی بەوە کردووە، کە تاوەکو ئێستا دیار نییە درۆنەکە لە کوێوە هڵدراوە و ئامانجەکەی چی بووە. هەروەها ڕوونیشی کردەوە کە بەهۆی خستنەخوارەوەی درۆنەکە، هێشتا قەبارەی زیانە ماددییە ئەگەرییەکان یان بوونی زیانی گیانی بە تەواوی پشتڕاست نەکراوەتەوە.
پاڵاوگەی بێجی، یەکێکە لە گرنگترین دامەزراوە نەوتییەکانی عێراق و ڕۆڵێکی سەرەکی لە دابینکردنی سووتەمەنی و پێداویستییە ناوخۆییەکانی وڵاتدا دەگێڕێت، هەر بۆیە پاراستنی ئاسایشی پاڵاوگەکە بە ئەولەویەتێکی باڵای هێزە ئەمنییەکان دادەنرێت.