جێگری ئەمینداری گشتیی نەتەوە یەکگرتووەکان و بەڕێوەبەری هەرێمیی بەرنامەی پەرپێدانی نەتەوە یەکگرتووەکان بۆ وڵاتانی عەرەبی (UNDP)، عەبدوڵا دەردەری، ئەمڕۆ دووشەممە ڕایگەیاند کە چوار سەرۆکایەتییەکەی عێراق هاوڕان لەسەر دژایەتیکردنی گەندەڵی و پشتبەستن بە ئابوورییەکی ڕکابەر بۆ دابینکردنی ژیانێکی شایستە بۆ هەموو هاوڵاتیان.
گرنگترین خاڵەکانی ناو لێدوانی بەرپرسەکەی نەتەوە یەکگرتووەکان:
دیدگای هاوبەشی سەرۆکایەتییەکان: دەردەری لە میانەی کۆبوونەوەیەکی میدیاکارییدا ئاماژەی بەوە کرد کە لە سەردانەکەیدا بۆ عێراق چاوی بە چوار سەرۆکایەتییەکە (کۆمار، وەزیران، پەرلەمان، و دادوەری) و چەندین وەزیر کەوتووە، و گوێبیستی دیدگایەکی تەواوکاری و هاوبەش بووە بۆ گواستنەوەی عێراق بەرەو ئابوورییەکی بەهێز و کێبڕکێکار کە تەنیا پشت بە نەوت (ئابووری ڕێعین) نەبەستێت.
چاکسازییە سەرەکییەکان: سەرۆکایەتییەکان جەختیان لەسەر پێویستیی چاکسازی لە سیستمی پاراستنی کۆمەڵایەتی، ڕێکخستنەوەی هاوکاری و پاڵپشتییە داراییەکان (الدعم)، کۆنترۆڵکردنی چەک و بەرەنگاربوونەوەی گەندەڵی کردووەتەوە بە جۆرێک کە خزمەتگوزارییە گشتییەکان بۆ هاوڵاتیان باشتر بکرێن.
بوێری لە ڕووبەڕووبوونەوەدا: ئەم بەرپرسە نێودەوڵەتییە سەرسامیی خۆی بە قووڵی و دووربینیی ئەم کۆدەنگییە سیاسییە نیشانداوە و ڕایگەیاندووە کە هێنانەئارای چاکسازی لە چەندین مەلەفی هەستیاردا وەک گەندەڵی، چەک و ئاڵوگۆڕی ئابووری لە یەک کاتدا، بەڵگەیە لەسەر بوێریی حکومەت لە هێنانەپێشەوەی بابەتەکاندا.
