هەینی 18ـی ئۆکتۆبەری 2024، دلاوەر بوزۆ، قایمقامی ئاکرێ، لە کۆنگرەیەکی ڕۆژنامەوانیدا ڕایگەیاند “بە گشتیی پێشمەرگەی ئێمە بە شەرف و کەرامەت بەرگریی لە کوردستان دەکەن، ئێستەش زۆربەیان کاتژمیر 7:00 هاتوون بۆ ئەوەی یەکەم کەس بن دەنگی خۆیان بدەن.”
قایمقامی ئاکرێ گوتی: “پێشمەرگەکان و هێزە ئەمنییەکان بە دڵسۆزانە دەنگ دەدەن ئەوەش نیشانەی ئەوەیە دەیانەوێت پرۆسەکە بەشێوەیەکی ئارام و ئازاد بەڕێوە بچێت.”
دەشڵێت: “لە هەندێک بنکەکان قەرەباڵەغی هەبوو، بەڵام سوپاس بۆ هێزە ئەمنییەکان چارەی ئەوە کێشەیان کرد، هیوادارین هیچ گرفتێک دروست نەبێت.”
لای خۆیەوە بەرپرسی بنکەیەکی دەنگدان گوتی: “تاکو ئێستە دەنگدان لەم بنکەیە زۆر باشە وەکو ئامێرەکانیش تاکوو ئیستە هیچ گرفتێکمان بۆ دروست نەبووە.”
لەلایەکی دیکەوە عەمید قاسم محەممەد، بەرپرسی پۆلیسی ئاکرێ دەڵێت: “ئێمە هەموو کات هەر لە خزمەتداین و خزمەتیش دەکەین، هیچ کێشە و گرفتێکمان نییە، بەتایبەت لە بنکەی گوڵانی ئاکرێ، قەرەباڵەغییەک دروست بوو، بەڵام لای خۆمانەوە ئەو گرفتەمان چارەکرد، پرۆسەکە بە دڵخۆشی و بە سەربەرزیی و بێکێشە لای ئێمە بەڕێوە دەچێت.”
گوتیشی: “داوا لە هەموو لایەنێک دەکەین چەک و کامێرا و موبایل لەگەڵ خۆیان نەهێنن، تاکو پرۆسەکە بەبێ کێسە و ئارامی بەڕێوە بچێت“.