ئەمڕۆ لایەنە کوردییەکان لە پارێزگای دیالە کۆبوونەوە بۆ تاوتوێکردنی بڕیاری حکومەتی فیدراڵی سەبارەت بە بەقەزاکردنی قەرەتەپه و لکاندنی بەشێک لە ناوچەکانی سەر بە خانقین بۆ سەر ئیدارەی نوێ.
لە بەیاننامەیەکدا لایەنەکان رایانگەیاندووه، “کۆبوونەوەکە ناڕەزایی توندی خۆیان بۆ ئەم بڕیارە دەربڕی و پێدەچێت لەڕووی سیاسییەوە بوونی کوردی بەئامانج گرتووه و و ئامانجیشی کەمکردنەوەی یەکە ئیدارییەکانی خانەقینە”.
لایەنه کوردییەکان رایانگەیاند که بڕیارەکە پێشێلکردنی دەستووری هەمیشەیی عێراقە، بە تایبەتی مادەی (١٤٠) کە تێیدا هاتووە ناوچەکانی خانەقین و قەرەتەپه و کۆکس لە ناوچە جێناکۆکەکانن و دەبێت قۆناغە یاسایی و دەستوورییەکان تێپەڕن پێش ئەوەی بڕیار لەسەر چارەنووسی کارگێڕییان بدرێت”.
ئاماژەی بەوەش کرا، “بڕیارەکه بەڕوونی پێچەوانەی دەسەڵاتە ئیداریەکانه، بۆ نموونه ناحیەی کۆکس لە ساڵی ٢٠٠٣ـەوە لەڕووی کارگێڕییەوە لەژێر ئیدارەی گەرمیان و حکومەتی هەرێمی کوردستاندایە، لەکاتێکدا بڕیارە نوێیەکەی وەزارەتی پلاندانانی عێراق قەزای قەرەتەپە دەگرێتەوە”.
جەختیشیان کردەوه، ئەم بڕیاره رەتدەکەنەوە و هەموو رێگایەکی یاسایی و دەستووری و جەماوەری دژی دەگرنەبەر و بڕیارەکە واقیعی ئیداری و دانیشتووانی هەرێم لەبەرچاو ناگرێت و بەشێکە لەو گۆڕانکارییە سیاسییە رەتکراوانە.