بەداخەوە درەنگانی شەوی ڕابردوو ٢٠٢٦/٣/٢٤، لە لایەن دەوڵەتی ئێرانەوە هێرش کرایە سەر بارەگایەکی هێزی پێشمەرگەی کوردستان لە سنووری ئیدارەی سەربەخۆی سۆران، کە لە ئەنجامدا ژمارەیەک شەهید و برینداری لێ کەوتەوە.
ئێمە بە توندی سەرکۆنەی ئەو هێرشە دەکەین و بە بەزاندنی ئاشکرای سەروەریی خاک و سنوورەکانی دادەنێین، کە ئەمەش بە تەواوی پێچەوانەی بنەما نێودەوڵەتییەکان و مافی دراوسێیەتییە. هەرێمی کوردستان لە سەرەتای ئەم شەڕ و ئاڵۆزییانەوە پەیامی ڕوونی هەبووە و هەمیشە فاکتەرێکی ئارامی بووە؛ نەبووەتە بەشێک لەو شەڕە و بەردەوام داوای ئاشتی و دیالۆگی کردووە.
بەئامانجگرتنی بێ پاساو بەداخەوە بەردەوام و بێ هیچ پاساوێک، هەرێمی کوردستان و هێزەکانی پێشمەرگە دەکرێنە ئامانج و زۆرجاریش خەڵکی مەدەنی دەبنە قوربانیی ئەم هێرشانە، بۆیە داوا لە کۆمەڵگەی نێودەوڵەتی و حکومەتی فیدراڵیی عێراق دەکەین، هەوڵەکانیان بخەنە گەڕ بۆ دوورخستنەوەی عێراق و هەرێمی کوردستان لە مەترسییەکانی ئەو جەنگە. پێویستە ئەرکی پاراستنی خاک و خەڵکی هەرێمی کوردستان لە ئەستۆ بگرن و ڕێگە نەدەن خاکی هەرێم ببێتە گۆڕەپانی یەکلاکردنەوەی ململانێی وڵاتە شەڕکەرەکان.
داوا لە دەوڵەتی کۆماری ئیسلامیی ئێران دەکەین چیتر سنووری هەرێمی کوردستان نەبەزێنێت، ڕێزی مافی دراوسێیەتی بگرێت و نەبێتە مایەی ترس و هەڕەشە بۆ سەر خەڵک و خاکی هەرێمی کوردستان.
ڕۆحی شەهیدان شاد و ئارام بێت و خوای گەورە بە بەهەشتی بەرینیان شاد بکات، هیوای زوو چاکبوونەوەش بۆ بریندارانی ئەو هێرشە ناڕەوایە دەخوازین.
دەستەی سەربەخۆی مافی مرۆڤ لە هەرێمی کوردستان
٢٠٢٦/٣/٢٤