توێژینەوەیەکی نوێ کە لە گۆڤاری زانستیی (Nature Human Behaviour) بڵاوکراوەتەوە، زەنگێکی مەترسیدار بۆ دایکان و باوکان لێدەدات و ئاشکرای دەکات کە چوونە ناو تۆڕە کۆمەڵایەتییەکان لە تەمەنێکی زووەوە، پەیوەندییەکی ڕاستەوخۆی بە دابەزینی ئاستی خوێندنی منداڵانەوە هەیە. بەپێی توێژینەوەکە، ئەو قوتابیانەی لە تەمەنی منداڵیدا ئەکاونتی تۆڕە کۆمەڵایەتییەکان دەکەنەوە، لە وانەکانی بیرکاری و زمانی دایکدا نمرەی کەمتر بەدەستدەهێنن بەراورد بەو هاوتەمەنانەی خۆیان کە درەنگتر دەستیان بەم پلاتفۆرمانە کردووە.
وردەکاریی توێژینەوەکه
کاریگەریی نەرێنی لەسەر بیرکاری و زمانی دایک: توێژینەوەکە لەسەر زیاتر لە ۵ هەزار قوتابی تەمەن ۷ بۆ ۱۶ ساڵ لە باکووری ئیتالیا ئەنجامدراوە. دەرکەوتووە ئەو قوتابیانەی لە تەمەنی ۱۱ یان ۱۲ ساڵیدا چوونەتە ناو تۆڕە کۆمەڵایەتییەکان، لە تاقیکردنەوەکانی پۆلی هەشتەم و دەیەمدا (تەمەنی ۱۳ تا ۱۶ ساڵی) ئاستی زانستییان بە تایبەت لە وانەی بیرکاریدا بەشێوەیەکی بەرچاو پاشەکشەی کردووە، کە هۆکارەکەی بۆ سەرقاڵبوونی مێشک و حەوانەوەی بە مۆبایل لە کاتە گرنگەکانی ڕۆژدا دەگەڕێتەوە.
سەرسوڕهێنەریی وانەی ئینگلیزی: بە پێچەوانەی بیرکاری و زمانی ئیتالییەوە، ئەم کاریگەرییە خراپە لەسەر وانەی زمانی ئینگلیزی (وەک زمانی بیانی) بەدی نەکراوە؛ توێژەران پێیان وایە زۆریی ناوەڕۆکی ئینگلیزی لە تۆڕە کۆمەڵایەتییەکاندا وەک جۆرێک لە فێربوونی نافەرمی هاوکاری قوتابیان کردووە.
شەپۆلی قەدەغەکردن لە ئەوروپا: بڵاوبوونەوەی ئەم توێژینەوەیە هاوکاتە لەگەڵ گەرمبوونی گفتوگۆ سیاسییەکان لە ئەوروپا. دوای ئەوەی ئوسترالیا تەمەنی خوار ۱۶ ساڵی قەدەغە کرد، فەڕەنساش یاسای بۆ قەدەغەکردنی خوار ۱۵ ساڵ پەسەند کردووە و بەریتانیا و ئیسپانیایش تاوتوێی ڕێکاری هاوشێوە دەکەن.
ڕای جیاوازی ئیتاڵیا: سەرەڕای ئەوەی توێژینەوەکە لە ئیتاڵیا کراوە، بەڵام جۆرجیا مێلۆنی، سەرۆک وەزیرانی ئەو وڵاتە ڕایگەیاندووە کە وڵاتەکەی یاسای قەدەغەکردنی تەواوەتی دەرناکات، چونکە بە ئاسانی دەورە دەدرێت و میکانیزمەکانی دیاریکردنی تەمەن لە جیهاندا هێشتا بەتەواوی کارا نین.
هەواڵی پێشوو