خواردنی ژەمی بەیانیان یەکێکە لە ژەمە هەرە گرنگەکانی رۆژ، چونکە خواردنی ژەمێکی تەندروست یارمەتی جەستە دەدات ماددە خۆراکییە پێویستەکان بەدەست بهێنێت. ئەمە دەبێتە هۆی پاراستنی وزە و هەستکردن بە تێری بەدرێژایی رۆژ. لێرەدا پێنج هۆکار خراونەتە روو کە پێویستە لەبەرچاو بگیرێن بۆ ئەوەی ئەو ژەمە گرنگە پشتگوێ نەخرێت:
١. ئاستەکانی وزە
لە کاتی خەودا جەستە وزە بۆ بەڕێوەبردنی کارەکان بەکاردەهێنێت، بۆیە بەرەبەیان ئاستی شەکر لە خوێندا و پاشەکەوتی گلۆکۆز کەم دەبێتەوە. خواردنی ژەمی بەیانیان یارمەتی بەدەستهێنانی وزەی پێویست دەدات و ئاستی وزە بەرزدەکاتەوە. دانانی کوپێک شیر وەک بەشێک لە ژەمێکی تەندروستی بەیانیان رێگەیەکی گونجاوە بۆ گەڕاندنەوەی ئاستی گلۆکۆز بۆ جەستەی منداڵ و پێدانی ئەو وزەیەی پێویستییەتی بۆ بەسەربردنی بەیانییەکی چالاک.
٢. بەرزکردنەوەی ئاستی توانای کارکردن
پێدانی وزە بە جەستە لە رێگەی ژەمی بەیانیانەوە یارمەتیدەرە بۆ باشترکردنی توانای کارکردن لە قوتابخانە و شوێنی کار. توێژینەوەکان دەرخستووە ئەو منداڵانەی ژەمی بەیانیان دەخۆن لە کاتی بەیانیاندا ئاستی توانای هزرییان بەرزترە و لە قوتابخانەشدا ئاستیان باشترە. هەروەها دەرکەوتووە توانای هزری پێگەیشتووانیش بە خواردنی ژەمی بەیانیان باشتر دەبێت، چونکە مێشک پێویستی بە وزەیە بۆ ئەوەی بە باشترین شێوە کاربکات.
٣. کێشی تەندروست
خواردنی ژەمی بەیانیان پەیوەندی بە کەمبوونەوەی کێشی جەستە و کەمکردنەوەی مەترسییەکانی قەڵەوبوونەوە هەیە. خواردنی ژەمی بەیانیان هەستی تێربوون باشتردەکات و رێگری لە خواردنی ژەمە سووکە ناتەندروستەکان دەکات. هەروەها ئەوانەی ژەمی بەیانیان دەخۆن چالاکترن، ئەمەش واتای ئەوەیە کالۆری زیاتر دەسووتێنن. دەستپێکردنی رۆژ بە ژەمێکی تەندروست رێکارێکی کاریگەرە بۆ کۆنترۆڵکردنی کێشی جەستە.
٤. ڤیتامین و کانزا پێویستەکان
توێژینەوەکان ئاماژە بەوە دەکەن ئەو کەسانەی بە بەردەوامی ژەمی بەیانیان دەخۆن، بڕێکی زیاتر لە ڤیتامین و کانزاکان بەدەستدەهێنن بەراورد بەوانەی ئەو ژەمە پشتگوێ دەخەن. ئەمە بەتایبەتی بۆ ئەوانە راستە کە دانەوێڵەی بەیانیان لەگەڵ شیر دەخۆن، چونکە دانەوێڵە تەندروستەکان بەشێوەیەکی سروشتی کۆمەڵێک ماددەی خۆراکیان تێدایە، شیر و ماستیش بەشێوەیەکی سروشتی دەوڵەمەندن بە ڤیتامین و کانزا سەرەکییەکان.
٥. باری دەروونی و تووڕەیی
هەستکردن بە برسییەتی دەبێتە هۆی ئەوەی کەسەکە بە ئاسانی تووڕەببێت و تەرکیزکردنە سەر کارەکانی پێش خۆی قورس بێت. ژەمی بەیانیی تەندروست یارمەتیت دەدات بەیانییەکە بەبێ ئازاری برسییەتی تێپەڕێنیت، کە زۆرجار وادەکات پەنا بۆ چارەسەری خێرا بەڵام ناتەندروست ببەیت. پرۆتین هەستی تێربوونی زیاتر دەبەخشێت، بۆیە دڵنیابوون لەوەی ژەمی بەیانیان بەشێکی باش پرۆتینی تێدایە، یارمەتیت دەدات بۆ ماوەیەکی درێژتر هەست بە تێری بکەیت.