ئاژانسی هەواڵی فەرمیی ئوردن لە زاری گوتەبێژی حکوومەتی ئەو وڵاتە بڵاوی کردەوە، دوای ناسینەوەی ئەو مووشەکانەی ئێران لە ئاسمانی ئەو وڵاتەدا هاویشتوونی، زەنگی ئاگادارکردنەوە لە سەرانسەری ئوردن لێ دراوە.
بە ڕاپۆرتی ڕۆیتەرز، گوتەبێژی حکوومەتی ئوردن هەروەها گوتی، هێزە چەکدارەکانی وڵاتەکەی لە ئامادەباشیی تەواودان و بۆ بەرەنگاربوونەوەی هەر جۆرە هەڕەشەیەک ئاسایشی پاشایەتیی ئوردن بخاتە مەترسییەوە، ئامادەییی تەواویان هەیە.
پێشتر میدیاکان لە ئێران هەواڵی هێرشی ئەو وڵاتەیان بۆ سەر بنکەیەکی ئەمریکا لە ئوردن بڵاو کردبووەوە و هەندێک وێنەشیان نیشان دابوو.
لە ماوەی جەنگی ئەم دواییەدا، تاران چەندین جار وەک تۆڵەی هێرشەکانی ئەمریکا و ئیسرائیل بۆ سەر ئێران، بنکە و دامەزراوە سەربازییەکانی ئەمریکای لە وڵاتانی ناوچەکە وەک قەتەر، بەحرەین، کووەیت و ئوردن کردووەتە ئامانج.