وەزارەتی دارایی عێراق و هەرێمی کوردستان هۆشدارییەکی توند دەدەنە سەرجەم مووچەخۆران کە پێویستە تا کۆتایی مانگی ئابی داهاتوو لە پڕۆژەی “هەژماری من” خۆیان تۆمار بکەن، بەپێچەوانەوە پرۆسەی پێدانی مووچەکانیان بە تەواوی ڕووبەڕووی ئاستەنگ و ڕاگرتن دەبێتەوە.
ئەم بڕیارە وادەی کۆتایی (31ـی ئاب) دیاریکردووە، ئەمەش وایکردووە فشار و قەرەباڵخییەکی بێوێنە لەسەر بنکەکانی تۆمارکردن لە شاری سلێمانی دروستببێت. ڕۆژانە ژمارەیەکی زۆر لە فەرمانبەران لە کاتەکانی بەیانیی زووەوە لەبەردەم بانک و بنکەکاندا نۆرە دەگرن؛ ئەمەش بە مەبەستی خۆتۆمارکردن یان وەرگرتنەوەی کارتە بانکییەکانیان بۆ ئەوەی لە وادەی دیاریکراو دوانەکەون.
ئەم پێشهاتانە لە کاتێکدایە کە پێشتر هەڵمەتێکی فراوانی چەواشەکاری هەبوو بۆ ساردکردنەوەی فەرمانبەران لە بەشداریکردن لەم پڕۆژەیەدا. بەڵام لە ئێستادا بۆ ڕای گشتی ڕوون بووەتەوە کە ئەو لایەن و کەسانەی داوای بایکۆتکردنی پڕۆژەکەیان دەکرد، خۆیان پێشوەختە و لە پێش هەمووانەوە ناوی خۆیان لە پڕۆژەی “هەژماری من”دا تۆمار کردووە.