سەرچاوە ئاگادارەکان ئەمڕۆ ئاشکرایان کرد کە عەلی زەیدی، سەرۆک وەزیرانی عێراق، لە کۆتایی ئەم هەفتەیەدا بە سەردانێکی فەرمی دەگاتە تارانی پایتەختی ئێران بە مەبەستی نێوەندگیری و هێورکردنەوەی بارودۆخی ناوچەکە.
بەگوێرەی سەرچاوەیەکی ئاگادار بۆ شەفەق نیوز: سەردانەکەی زەیدی هەڵگری دەستپێشخەرییەکی نوێی عێراقییە بۆ کۆتاییهێنان بە هەڵکشانە سەربازییەکانی نێوان ئێران و ئەمریکا و کردنەوەی کەناڵی گفتوگۆ لە نێوانیاندا.
سەرچاوەکه ئاشکراشی کردووه: ئەم پێشنیازە هەفتەی ڕابردوو لە لایەن زەیدییەوە لە واشنتۆن خرایە بەردەم دۆناڵد ترامپ، سەرۆکی ئەمریکا، و لە لایەن ئەمریکاوە پێشوازیی لێ کراوە بۆ ڕێگریکردن لە فراوانبوونی شەڕەکە.
سەرچاوەکه دەڵێت: زەیدی لە تاران پێشنیازی ئەوە دەکات کە بەغدا لە ئایندەیەکی نزیکدا میوانداریی کۆبوونەوەیەکی ڕاستەوخۆ یان ناڕاستەوخۆی بەرپرسانی ئەمریکا و ئێران بکات.
دوای کۆتاییهاتنی سەردانە پێنج ڕۆژییەکەی بۆ ئەمریکا، زەیدی ئەمڕۆ گەیشتە قەتەر بە مەبەستی بەشداریکردن لە پرسەی میری پێشووی ئەو وڵاتە. بڕیاریشە دوای ئێران، گەشتێکی ناوچەیی بۆ تورکیا، سعوودیە و سووریا ئەنجام بدات بۆ پتەوکردنی پێوەندییەکان و مەلەفی وزە.
ئەم هەوڵە دیپلۆماسییانەی عێراق لە کاتێکدان کە بەهۆی هێرشە سەربازییەکانی نێوان ئەمریکا و ئێرانەوە، ئاستەنگیی گەورە بۆ زنجیرەی دابینکردنی وزە لە گەرووی هورمز دروست بووە.
بڕیاره زەیدی دوای تاران سەردانی تورکیا بکات.