وەزارەتی پەروەردەی دانیمارک کۆمەڵێک ڕێکاری بەپەلە و توندی ڕاگەیاند بۆ ڕێگریکردن لە بەکارهێنانی نایاسایی ژیریی دەستکرد (AI) لەلایەن قوتابییانی قوتابخانە ناوەندییەکانەوە، کە بڕیارە لە هەفتەی داهاتووەوە بچنە بواری جێبەجێکردنەوە.
ماگنوس هاونیکە، وەزیری پەروەردەی دانیمارک ئاماژەی بەوە کرد کە قوتابخانە ناوەندییە باڵاکان لەگەڵ کێشەیەکی گەورەی فێڵکردن بە ژیریی دەستکرد ڕووبەڕوو بوونەتەوە، ئەمەش پێویستی بە وەڵامدانەوەیەکی خێرا هەیە بۆ پاراستنی توانستی زانستی و بیرکردنەوەی سەربەخۆی قوتابییان.
گرنگترین ڕێکارە نوێیەکان:
تاقیکردنەوەی زارەکی بۆ ئەرکەکانی ماڵەوە: تەواوی ئەو تاقیکردنەوە نووسراوانەی لە ماڵەوە ئەنجام دەدرێن، دەبێت قوتابی بە شێوەی زارەکی بەرگرییان لێ بکات، لەوانەش تاقیکردنەوەی ساڵانەی (SSO) کە ۹ هەزار قوتابی دەگرێتەوە.
چاودێریکردنی ئەلیکترۆنیی شاشەکان: قوتابخانەکان پابەند دەکرێن بە بەکارهێنانی ئامرازی چاودێری بۆ شاشەی کۆمپیوتەری قوتابییان لە کاتی تاقیکردنەوەکاندا، هاوکات لەگەڵ بەکارهێنانی سیستەمی پاراستنی (Firewall) بۆ فلتەرکردنی ئۆنلاین لە کاتی وانەکاندا.
ئەنجامدانی ئەرکەکان لەناو قوتابخانەدا: هاندانی قوتابخانەکان بۆ ئەوەی قوتابییان ناچاری ئەنجامدانی ئەرکەکانیان بکەن لەژێر چاودێریی ڕاستەوخۆی مامۆستایاندا لە ناو پۆلەکاندا.
ئەم بڕیارە لە کاتێکدایە کە وڵاتانی دیکەی ئەوروپاش، وەک نەرویج، ڕێکاری توندیان دژ بە بەکارهێنانی ژیریی دەستکرد لە کەرتی پەروەردەدا گرتووەتە بەر، بەپێی ڕاپرسییە ئامارییەکانیش، زیاتر لە نیوەی هاوڕانی ئەوروپی پێیان وایە ئەم تەکنەلۆژیایە هاوشانی سوودەکانی، ئاڵنگاریی جدیی بۆ پرۆسەی خوێندن دروست کردووە.