ئەمڕۆ سێشەممە، 18ی ئابی 2026، لەگەڵ بەردەوامیی مامەڵەکان لە بازاڕەکانی وزەدا، نرخەکانی نەوت لە بازاڕەکانی جیهاندا بە شێوەیەکی بەرچاو ڕوویان لە بەرزبوونەوە کردەوە و برێنت ئاستی 91 دۆلاری تێپەڕاند.
ئەم هەڵکشانە توندەی نرخەکان ڕاستەوخۆ دوای ئەوە دێت کە ناکۆکی و گرژییە سیاسی و سەربازییەکانی نێوان ئێران و ئەمریکا لە تەنگەی هورمز سێبەری بەسەر بازاڕەکاندا کێشایەوە. سەرهەڵدانەوەی ئەو ئاڵۆزییانە مەترسیی پچڕان یان ئاستەنگ دروستبوون لە ڕێڕەوی گواستنەوەی نەوتی دروستکردووە، ئەمەش وایکرد وەبەرهێنەران و بازرگانان پەلە بکەن لە کڕینی گرێبەستەکان بۆ پاراستنی بەرژەوەندییەکانیان.
لە گۆڕانکارییەکانی ئەمڕۆی بازاڕدا، نرخی هەر بەرمیلێک نەوتی خاوی برێنت بازدانێکی توندی تۆمارکرد و نیشتەوە سەر 91.50 دۆلار، کە بەراورد بە ئامارەکانی دوێنێ (88.60 دۆلار) بە بڕی 2.90 دۆلار بەرزبووەتەوە. هاوكات، نرخی هەر بەرمیلێک نەوتی خاوی سووکی تەکساسی ئەمریکیش هەڵکشانێکی بەرچاوی بەخۆوە بینی و گەیشتە 85.25 دۆلار، کە بەراورد بە دواین ئاماری تۆمارکراو (82.21 دۆلار) بەرزبوونەوەیەکی توندی 3.04 دۆلاری نیشان دەدات.
ئەم هەڵکشانە خێرایەی کۆتایی بە سەقامگیریی کاتیی ناوچەکە هێنا و نیشانیدا کە هەر کێشمەکێش و ناڕوونییەک لە ڕەوشی تەنگەی هورمز و پەیوەندییەکانی نێوان تاران و واشنتن، بە خێرایی کۆنترۆڵی بازاڕی جیهانیی وزە دەکات و نرخەکان بەرەو ئاستی بەرزتر ئاڕاستە دەکات.