لە کاتێکدا جیهان بەدەست قەیرانی توندی کەمئاوییەوە دەناڵێنێت، حکوومەتی هەرێمی کوردستان سەرکەوتنێکی گەورەی لە کەرتی ئاودا تۆمار کردووە. بەپێی نوێترین ئامارەکانی بەڕێوەبەرایەتی گشتی ئاو و ئاوەڕۆ، هەرێمی کوردستان توانیویەتی پشکی ئاوی پاک بۆ هەر تاکێک بگەیەنێتە ٤٠٠ لیتر لە ڕۆژێکدا، ئەمەش وەک وەرچەرخانێکی گەورە لە ژێرخانی خزمەتگوزارییەکانی کابینەی نۆیەم هەژمار دەکرێت.
کێبڕکێی وڵاتە پێشکەوتووەکان
بەپێی داتا بەراوردکارییەکان، هەرێمی کوردستان لە ڕووی دابینکردنی ئاوەوە لە ئاستێکی یەکجار بەرزدایە و کێبڕکێی دەوڵەمەندترین وڵاتانی جیهان دەکات. لە کاتێکدا پشکی تاک لە هەرێم ٤٠٠ لیترە، ئەم بڕە بە جیاوازییەکی زۆر لە پێش وڵاتانی وەک ئیتاڵیا (٢٢٨ لیتر)، فەڕەنسا (١٥١ لیتر)، بەریتانیا (١٣٦ لیتر) و ژاپۆن (٩٩ لیتر) دێت. هەروەها لەسەر ئاستی ناوخۆیی، پشکی تاکی کورد دوو هێندەی ستانداردی عێراقە کە تەنها ١٩١ لیترە.
ستراتیژیی کابینەی نۆیەم و ئاسایشی ئاو
ئەم دەستکەوتە لە چوارچێوەی پلانی ستراتیژیی کابینەی نۆیەمی حکوومەتی هەرێمی کوردستاندایە بۆ ڕووبەڕووبوونەوەی گۆڕانی کەشوهەوا و وشکەساڵی. حکوومەت توانیویەتی لە ڕێگەی تێکەڵکردنی سەرچاوەکانی ئاوی سەر زەوی و ژێر زەوی، هاوسەنگییەکی تەواو لە دابینکردنی ئاو بۆ زیاتر لە ٦ ملیۆن و ٣٧٠ هەزار هاووڵاتی دروست بکات و ئاسایشی ئاوی نەوەکانی داهاتوو بپارێزێت.
ژمارە و داتاکانی بەرهەمهێنان
ئامارەکان نیشانی دەدەن کە ڕۆژانە بڕی ٢,٩٧٠,٢٠٦ مەتر سێجا ئاوی پاک لە هەرێمی کوردستان بەرهەم دەهێنرێت. ئەم پڕۆسەیە لە ڕێگەی ژێرخانێکی فراوانەوە بەڕێوە دەچێت کە پێکدێت لە:
- ٢٥ پڕۆژەی ستراتیژیی گەورە.
- ٤,٩١٦ بیری ئاو و ٥٤٧ کانیاو.
- تۆڕی گەیاندنی ئاو بە درێژایی ٢٠,٨٩٥ کیلۆمەتر.
- خزمەتگوزاری بۆ ١,٠٩٥,٩٣٦ هاوبەشی ئاو.
گەشەی بەرهەمهێنان لە ٢٠٢٤
لە شەش مانگی یەکەمی ئەمساڵدا، کۆی گشتی بەرهەمهێنانی ئاوی پاک گەیشتووەتە زیاتر لە ٤٢٨ ملیۆن مەتر سێجا. ئامارەکان دەری دەخەن کە حکوومەت توانیویەتی لە وەرزی گەرمادا ئاستی بەرهەمهێنان بەرز بکاتەوە، بە شێوەیەک لە مانگی حوزەیراندا گەیشتووەتە لوتکە بە زیاتر لە ٨٠ ملیۆن مەتر سێجا، ئەمەش توانای دامەزراوەکانی حکوومەت دەسەلمێنێت لە کۆنترۆڵکردنی زیادبوونی خواست لەسەر ئاو.
ئەم هەنگاوانەی وەزارەتی شارەوانی و گەشتوگوزار، نیشانەی بایەخی جددی کابینەی نۆیەمە بە کەرتی خزمەتگوزارییە سەرەتاییەکان و پەرەپێدانی ژێرخانی ئابووری و ژینگەیی لە هەرێمی کوردستاندا.