بەڕێوەبەرایەتی پۆلیسی پارێزگای هەولێر، لە ڕوونکردنەوەیەکدا ڕایگەیاند، هێزەکانیان چەند کەسێکیان دەستگیرکردووە کە ببوونهتە هۆکاری دروستکردنی پشێوی و نائارامی لە سنووری قەزای خەبات.
بەپێی ڕوونکردنەوەکەی پۆلیس، شەوی یەکشەممە ڕێکەوتی ٢٣ی ئابی ٢٠٢٦، لە گوندی “گردەڕەشە”ی سەر بە قەزای خەبات، چەند کەسێک هەوڵی تێکدانی بارودۆخی ناوچەکە و دروستکردنی پشێوییان دابوو. پۆلیسی هەولێر ئاماژەی بەوە کردووە کە بە مەبەستی پاراستنی ئۆقرەیی و ڕێگریکردن لە هەر زیانێکی گیانی و ماددی کە بەر هاووڵاتیان و کەرتی گشتی بکەوێت، هێزەکانیان دەستبەجێ گەیشتوونەتە شوێنی ڕووداوەکە.
لە بەشێکی دیکەی ڕاگەیەندراوەکەدا هاتووە: “ئەوانەی دەستیان لە دروستکردنی پشێوییەکەدا هەبووە، بە فەرمانی دادوەر ڕاگیراون و ڕێکاری یاسایی توند بەرامبەر هەموو ئەو کەسانە دەگیرێتە بەر کە بەشداربووی ڕووداوەکە بوون.”
بەڕێوەبەرایەتی پۆلیسی هەولێر پەیامێکی هۆشداریشی ئاراستەی سەرپێچیکاران کردووە و ڕایگەیاندووە، کە بە هیچ شێوەیەک ڕێگا نادرێت کەسانێک زیان بە ئاسایش و دۆخی ئارامی ناوچەکە بگەیەنن. دوپاتیشیان کردووەتەوە کە پۆلیس وەک جێبەجێکاری یاسا، بەردەوام دەبێت لە پاراستنی موڵک و ماڵی گشتی و تایبەتی هاووڵاتیان.