ڕۆژی یەکشەممە ٤/١٠/٢٠٢٦ لە شاری هەولێر کۆڕبەندی ئابووری نێوان هەرێمی کوردستان و کۆماری ڕووسیای فیدراڵ بەڕێوەچوو.
لە سەرەتای کۆڕبەندەکەدا بەڕێز گەیلان حاجی سەعید، سەرۆکی یەکێتی ژوورەکانی بازرگانی و پیشەسازی هەرێمی کوردستان، وتەیەکی پێشکەشکرد و وێڕای بەخێرهێنان، ئاماژەی بە ڕەوشی بازرگانی و پیشەسازی هەرێمی کوردستان و پەیوەندی یەکێتی ژوورەکان لەگەڵ وڵاتانی جیهان و چۆنیەتی پێشخستنی کاری بازرگانی و پیشەسازی کرد.
وتی: «ئێمە دەمانەوێت لەگەڵ کۆماری ڕووسیای فیدراڵ کاری بازرگانی و هاتنی کۆمپانیاکانیان لێرە زیاتر بکەین .»
هەروەها گوتیشی: «لە ماوەی داهاتوودا شاندێکی یەکێتی ژوورەکان سەردانی مۆسکۆ دەکات بۆ ئەنجامدانی ژمارەیەک دیدار و کۆبوونەوە لەگەڵ بازرگان و خاوەنکارانی رووسیا و وەکو یەکێتی ژوورەکان ئامادەیی هەموو جۆرە هاوکاری و هەماهەنگییەکین .
دواتر سەوەر کەمال هاواری بریکاری وەزارەتی بازرگانی و پیشەسازی حکومەتی هەرێمی کوردستان بە ناوی وەزارەت وتەیەکی پێشکەش کرد و ئامادەی هەموو هاوکاری و هەماهەنگیەکی نیشاندا . هەر لە کۆربەندەکەدا مەکسیم مالاچۆ بەرپرسی ئەنجومەنی بازرگانی و ئابووری رووسیا عێراق وتەیەکی پێشکەش کرد و خۆشحاڵی خۆی بە ئەنجامدانی ئەو کۆربەندە دەربری و گوتی دەمانەوێت کاری بازرگانی و هێنانی کۆمپانیاکانی رووسیا بۆ هەرێمی کوردستان زیاتر بکەین .»
هەر یەکە لە بەرێزان نەوزاد غەفور جێگری سەرۆكی یەكێتی ژوورەكان و سەرۆکی ژووری بازرگانی و پیشەسازی سلێمانی و شوکری جەمیل سەرۆکی ژووری بازرگانی و پیشەسازی دهۆک و شێخ تاهیر عزالدین جێگری سەرۆكی یەكێتی ژوورەكان و سەرۆکی ژووری بازرگانی و پیشەسازی هەڵەبجە وتەی خۆیان پێشکەشکرد و باسیان لە کاری بازرگانی و پرۆژەکانی سێکتەرە جیاوازەکانی ئابوری شارەکانیان کرد و ئامادەی خۆیان بۆ کۆمپانیاکانی ڕووسیای فیدراڵ دەربری بۆ ئەوەی بچن لەو شارانە کار و پرۆژە ئەنجام بدەن .
هەر لە کۆڕبەندەکەدا د. محەمەد شوکری، سەرۆکی دەستەی وەبەرهێنانی هەرێمی کوردستان، وتەی خۆی پێشکەشکرد و وتی: «بە ناوی حکومەتی هەرێمی کوردستان و دەستەی وەبەرهێنان، دەستخۆشی ئەنجامدەرانی ئەو کۆربەندە دەکەم و
ڕایگەیاند: «گرنگە بازرگان و وەبەرهێنەرانی هەرێمی کوردستان کاڵا و بەرهەمەکانی خۆیان هەناردەی وڵاتی ڕووسیای فیدراڵ بکەن و بازرگان و وەبەرهێنەرەکانی ڕووسیاش کاڵا و بەرهەمی خۆیان بێنن بۆ هەرێم و ئاڵوگۆڕی بازرگانی و پیشەسازی زیاتر بکەن.»
هەروەها ئامادەیی هەموو جۆرە هاوکاری و هەماهەنگییەکی نیشاندا.
دواتر دیداری B2B لە نێوان بازرگان و وەبەرهێنەرانی هەرێمی کوردستان و کۆماری روسیای فیدراڵ بەڕێوەچوو.