وەزارەتی بازرگانیی تایلەند، پلانێکی بۆ بەهێزکردنەوەی هەناردەی برنج ڕاگەیاند، دوای ئەوەی لە نۆ مانگی یەکەمی ساڵی ٢٠٢٦دا هەناردەکردن بە ڕێژەی ١٩.٢٦٪ بەراورد بە هەمان ماوەی ساڵی ڕابردوو دابەزی؛ ئەمەش لە سایەی کەمبوونەوەی فرۆشتن بە عێراق، زیادبوونی کێبڕکێ لەگەڵ هیندستان و گرژییەکانی ڕۆژهەڵاتی ناوەڕاست و بەرزیی تێچووی گواستنەوەدا.
ڕۆژنامەی تایلەندیی «ذا نيشن» لە ڕاپۆرتێکدا کە شەفەق نیوز وەریگێڕاوە بڵاوی کردەوە که تایلەند لە ماوەی کانوونی دووەم تا ئەیلوولی ٢٠٢٦ بڕی ٤.٩٩ ملیۆن تۆن برنجی هەناردە کردووە، هاوکات داهاتی هەناردەکردن بە ڕێژەی ١٦.٨٤٪ دابەزیوە و گەیشتووەتە ٢.٩٦٢ ملیار دۆلار.
سکرتێری هەمیشەیی وەزارەتی بازرگانیی تایلەند، بۆنبۆنگ نایاناباکورن، ڕایگەیاند کە بەرزبوونەوەی کڕینی برنجی تایلەندی لەلایەن فیلیپین و مالیزیاوە تا ڕادەیەک قەرەبووی کەمبوونەوەی فرۆشتنی بە عێراق کردووەتەوە، چونکە ئەو دوو وڵاتە بۆ ڕووبەڕووبوونەوەی مەترسییەکانی دیاردەی نینیو و بەهێزکردنی ئاسایشی خۆراکیان دەستیان بە زیادکردنی هاوردەکردن کردووە.
نایاناباکورن ئاماژەی بەوە دا کە هەناردەی برنجی تایلەندی بۆ عێراق لە سەرەتای ئەم ساڵەوە بە شێوەیەکی بەرچاو دابەزیوە، ئەوەش بەهۆی گرژییەکانی ڕۆژهەڵاتی ناوەڕاستەوە؛ هەروەها ڕوونی کردەوە کە هەندێک بار هێشتا لە ڕێگەی تورکیاوە وەک ڕێگەیەک بۆ گەیشتن بە عێراق بەکار دێن، بەڵام بەرزبوونەوەی تێچووی گواستنەوە قەبارەی هەناردەکردنی سنوردار کردووە.