سەرچاوەیەکی دیپلۆماتی تورکی ڕۆژی پێنجشەممە، ٢٢ی ئۆکتۆبەر، بە ئاژانسی هەواڵی ڕۆیتەرزی گوت کە هاکان فیدان، وەزیری دەرەوەی تورکیا، ڕۆژی هەینی میوانداریی هاوتاکانی لە میسر، پاکستان، عەرەبستانی سعوودی، بەریتانیا، فەڕەنسا و ئەڵمانیا لە ئیستانبوڵ دەکات تا گفتوگۆ لەسەر ململانێ هەرێمییەکان بکەن.
ئەو سەرچاوەیە هەروەها گوتوویەتی کە ئەم حەوت وڵاتە، لە کاتێکدا شەڕ لە ئێران، یەمەن و ئۆکراینا هەڕەشە لە ڕێڕەوەکانی گواستنەوەی دەریایی و ئاسایشی ناوچەکە دەکەن، بە دەستپێشخەریی تورکیا بۆ یەکەم جار بەم شێوەیە کۆ دەبنەوە.
سەرچاوەکە زیادیشی کرد کە پێشبینی دەکرێت فیدان جەخت لەسەر پێویستیی گەیشتن بە چارەسەرێکی دیپلۆماسی بۆ شەڕی نێوان ویلایەتە یەکگرتووەکان و ئێران و گرنگیی ئازادیی گواستنەوەی دەریایی لە گەرووەکانی هورمز و بابولمەندەب بکاتەوە. هەروەها دووبارە جەخت لەسەر پشتیوانیی تورکیا لە ئاسایشی عەرەبستانی سعوودی بەرانبەر هێرشەکانی چەکدارە حووسییەکانی یەمەن، کە لەلایەن ئێرانەوە پشتیوانی دەکرێن، لە چوارچێوەی ڕێککەوتنی بەرگریی هاوبەشی مەککە کە لە نێوان تورکیا، پاکستان و عەرەبستانی سعوودی واژۆ کراوە، بکاتەوە.
بە گوتەی سەرچاوەکە، فیدان ئاماژە بە مەترسییەکانی ئەم ململانێیە بۆ ئاسایشی ناوچەکە دەکات و هەروەها بە هاوتاکانی دەڵێت کە تورکیا هەوڵی داوە ڕێگری لە بڵاوبوونەوەی شەڕی ئۆکراینا بۆ دەریای ڕەش بکات.
بەپێی ئەم ڕاپۆرتە، وەزیرانی دەرەوەی گرووپی ناسراو بە E3، کە بەریتانیا، فەڕەنسا و ئەڵمانیا لەخۆ دەگرێت، لەگەڵ هاوتاکانیان لە گرووپی تازەپێکهێنراوی R4 کۆ دەبنەوە تا گفتوگۆ لەسەر پرسی فەلەستینییەکان، گۆڕانکارییەکانی یەمەن و گەرووی هورمز و ڕێگاکانی کۆتاییهێنان بە شەڕی ڕووسیا و ئۆکراینا بکەن.
گرووپی E3 زیاتر لە ٢٠ ساڵ لەمەوبەر بۆ پێشخستنی هەماهەنگیی دیپلۆماسی لەسەر پرۆگرامی ئەتۆمیی ئێران پێکهێنرا، لە کاتێکدا گرووپی R4 ئەمساڵ دامەزرا و میسر لەگەڵ واژۆکەرانی ڕێککەوتنی بەرگریی مەککە کۆ دەکاتەوە. ئەم پەیمانە ڕێککەوتنێکی بەرگریی هاوبەشە کە تورکیا، عەرەبستانی سعوودی و پاکستان لە مانگی ئابدا لەگەڵ یەکتر واژۆیان کرد.