لەپێناو پیش‌گرتن لە هەر جۆرە خۆپیشاندان و چالاکییەکی کۆمەڵگەی مەدەنی لە دژی لەکارلادانی محەمەد سدیق ئاکش و سەپاندنی قەیوم بەسەر شارەوانی جۆلەمێرگ، پارێزگاکانی دیاربەکر و وان قەدەغەیان راگەیاندبوو.
بەگوێرەی میدیاکانی تورکیا ماوەکە لە دیاربەکر قەدەغەکە بۆ سێ رۆژی دیکە درێژ کراوەتەوە و لە وانیش بۆ دوو رۆژی دیکە بەردەوام دەبن.
بڕیارەکانی دوای ئەوە دێن، دەم پارتی داوای خۆپیشاندان و دەربڕینی ناڕەزایەتی بەرانبەر بە بڕیاری سەپاندنی قەیوم کردبوو.
لە لایەکی دیکەوە، ئاژانسی فەرمیی تورکیا رایگەیاند، یەکەمین دادگای تاوانەکانی جۆلەمێرگ لە دانیشتنی ئەمڕۆ چوارشەممەدا سزای 19 ساڵ و 6 مانگی بەسەر محەمەد سدیق ئاکش سەپاندووە.
بەگوێرەی ئەم هەواڵە، ناوبراو تۆمەتی ئەندامبوونی لە پەکەکەی خراوەتەپاڵ کە تۆمەتەکە بۆ ساڵی 2014 دەگەڕێتەوە و لەو کاتەوە تا ئێستا پێڤاژۆی دادگاییکردنی یەکلایی نەبووەتەوە. ئاکش لە هەڵبژاردنی 31ـی ئاداردا لە جۆلەمێرگ بە دەنگی نزیکەی لەسەدا 49ـی دەنگدەران بە هاوسەرۆکی شارەوانیی ئەم پارێزگایە هەڵبژێردربوو.