هەڵاوسانی نرخ و کەمبوونەوەی کرێی دەستحەق و دابەزینی هێزی کڕین، بوونەتە هۆی کەمبوونەوەی کڕین و خواردنی خۆراک، بەتایبەتی گۆشتی سوور لەنێو چینی کرێکاران و توێژی خانەنشینان لە ئێران.
ئاژانسی هەواڵی (ئیلێنا) لە ڕاپۆرتێکدا ئاماژەی بە ژیانی كرێكاران و خانەنشینان لە ئێران داوە و ئاشكرای كردووە، ساڵانە ئەم چین و توێژە کەمتر لە دوو کیلۆ و نیو گۆشتی سوور دەخۆن.
ئاژانسە ئێرانییەكە ئاشكراشی كردووە، هەموو ئێرانییەک بە تێکڕا ساڵانە حەوت کیلۆ گۆشتی سوور دەکڕێ، بێگومان ئەمە ئاماری ساڵی ڕابردووە و لەگەڵ بەرزبوونەوەی نرخەکانی ئەم دواییە، چاوەڕوانی کەمبوونەوەی زیاتر دەكرێت، ئەم ئامارە پەیوەندیی بە تێکڕای بەکاربردنەوە لەناو هەموو چینەكاندا هەیە، بەڵام لە خێزانە کرێكارەكاندا بەکارهێنانی سەرتاسەری زۆر کەمترە لەم ژمارەیە.