بەپێی ڕاپۆرتی میدیاکان، کۆمپانیای ئەمریکیی ئەمازۆن نیازی هەیە ٣٠ هەزار کارمەندی ئیداریی خۆی لەکار دووربخاتەوە. ئەم هەنگاوە گەورەترین کەمکردنەوەی هێزی کارە لەم کۆمپانیایەدا لە کۆتایی ساڵی ٢٠٢٢ی زایینییەوە تا ئێستا.
بەپێی ڕاپۆرتی ڕۆیتەرز، ئەم زلھێزەی بازرگانیی ئۆنلاین خەریکی پلاندانانە بۆ جێبەجێکردنی شەپۆلێکی بەرفراوانی دەرکردنی کارمەندان، کە بە گوتەی سەرچاوە ئاگادارەکان، لە ئەمڕۆ سێشەممە ٢٨ی ئۆکتۆبەرەوە دەست پێ دەکات. ئامانج لەم بڕیارە کەمکردنەوەی تێچووەکانی کۆمپانیاکە ڕاگەیەندراوە.
بە گوتەی سەرچاوە نێوخۆییەکانی ئەمازۆن، بەشێکی زۆری ئەو کارمەندانەی لە سەردەمی پەتای کۆرۆنادا دامەزرابوون، ئەم بڕیارە دەیانگرێتەوە. کۆمپانیای ئەمازۆن تا ئێستا لەبارەی ئەم ڕاپۆرتانەوە خۆی لە لێدوانی فەرمی پاراستووە.
گوتراوە کە مەودای وردی ئەم کەمکردنەوەی هێزی کارە هێشتا دیار نییە و ئەگەری گۆڕانکاری لە ژمارەی دەرکراوەکاندا هەیە. بەڵام، بەپێی خەمڵاندنی سەرچاوە ئاگادارەکان، کەمکردنەوەی هێزی کارەکە نزیکەی ١٠%ی ٣٥٠ هەزار کارمەندی بەشی ئیداریی ئەمازۆن دەگرێتەوە. ئەم هەنگاوە، ئەگەر جێبەجێ بکرێت، گەورەترین کەمکردنەوەی هێزی کارە لە ئەمازۆن لە کۆتایی ساڵی ٢٠٢٢ەوە تا ئێستا. کۆی گشتیی کارمەندانی ئەمازۆن لە سەرتاسەری جیهاندا لە ئێستادا نزیکەی یەک ملیۆن و ٥٥٠ هەزار کەسە.
