ڕێکخراوی مافی مرۆڤی هەنگاو ڕایگەیاند، هێزەکانی ئێران لە نزیک گوندی ”تاژاندەرە”ی “شنۆ” هێرشیان کردووەتە سەری یەکێک لەو ماڵانەی کۆڵبەران بۆ پشوودانی خۆیان بەکرێیان دەگرن.
هەنگاو ئاماژەی بەوەش کردووە، دوای کوژران و برینداربوونی چەند کۆڵبەرێک تێکهەڵچوون لە نێوان هێزەکانی ئێران و کۆڵبەران ڕووی داوە و دوو پاسدار بریندار بوون. هەروەها ماڵی کۆڵبەرەکان دراوەتە بەر چەکی ئاڕپی‌جی و بەتەواوی وێران بووە.
ناوی کۆڵبەرە کوژراوەکە ڕامین شکاک و خەڵکی شاری سەڵماسە. ژمارەیەک کۆڵبەریش بریندار بوون، یەکێک لە کۆڵبەرە بریندارەکان دەستبەسەر کراوە و بۆ شوێنێکی نادیار گوازراوەتەوە.
هاوکات ژمارەیەک ئەسپ و هێستری ئەم کۆڵبەرانە کوژراون و بریندار کراون.
سەرچاوەکانی سەر به کۆماری ئیسلامی هەتا ئێستا زانیارییەکیان لەم بارەیەوە بڵاو نەکردووەتەوە.