دەزگەی گشتی كاروباری مین، لە بوونی كێڵگەیەكی مین، ئاگاداری دانیشتوانی گوندی پاروێڵە و گوندەكانی دەرووبەریشی دەكاتەوە لەسنووری ناحیەی پێباز و ڕایدەگەیەنێت، كە داواتان لێدەكەین خۆتان بەدوور بگرن لەو كێڵگە مینە.
ئەمڕۆ چوارشەممە 21ی 8ی 2024، دەزگەی گشتی كاروباری مین ئاگادارییەكی بەناوی بەڕێوەبەرایەتیی گشتیی كاروباری مینی گەرمیان بڵاو كردووەتەوە و تێیدا هۆشداری لە بوونی كێڵگەیەكی زیندووی مین دەداتە دانیشتوانی گوندی پاروێڵەی بچووك و گوندەكانی دەرووبەریشی و ڕایدەگەیەنێت: “لە ئەنجامی کاری ڕۆژانەی تیمی مینلابەری دەستی (GD3) لە کێڵگە مینی (مقڕ سریەکە_C) لە گوندی پاروێڵەی بچووک لە سنووری ناحیەی پێباز، ژمارەیەک مینی دژەکەسی تێدا دۆزراوەتەوە لە جۆری(Vs 50) سێ دانە و (ڤالمارا) یەک دانە، ئەمەش دەرخەری ئەوەیە ئەو کێڵگە مینە کێڵگەمینێکی زیندووە.”
لەبارەی ئەو كێڵگە مینەوە، دەزگەی كارەباری گشتیی مین، داوا لە دانیشتوانی گوندی پاروێڵە و گوندەكانی دەورووبەریشی دەكات، كە خۆیان بپارێزن و ڕاشیدەگەیەنێت: “لە پێناو پاراستنی گیانی خۆیان و ڕوونەدانی ڕووداوی نەخوازراو خۆیان بە دوور بگرن لە و کێڵگە مینە، تاوەکوو لە لایەن تیمەکانی مینلابەری دەستی بەڕێوەبەرایەتیی گشتیی کاروباری مینی گەرمیان بەتەواوەتی پاک دەکرێتەوە و دڵنیایی دەدرێت لە پاکردنەوەی ئەو کێڵگە مینە لە مەترسیەکانی مین و تەقەمەنی.”