لە هەنگاوێكی نوێدا، دەزگای خێرخوازیی بارزانی لەڕێی كردنەوەی كۆمەڵگەیەك دەرفەتی خوێندنی بێبەرامبەر بۆ فێرخوازانی (نابینا، كەمبینا، نابیست و كەمبیست) لە ئیدارەی سەربەخۆی سۆران دەڕەخسێنێ.
سەبری قاهرەمان، بەڕێوەبەری كۆمەڵگەی دایك، لە سنووری قەزای ناوەندیی سۆران، بە (باسنیوز)ی ڕگەیاند: “بۆ یەكەمجار لە ئیدارەی سەربەخۆی سۆران، دەزگای خێرخوازیی بارزانی لە كۆمەڵگەی دایك – قوتابخانەی (نابینا، كەمبینا، نابیست و كەمبیست) دەرفەتی خوێندنی بێبەرامبەر دەرەخسێنێت بۆ فێرخوازان، ئەو دەستپێشخەرییەش بەمەبەستی دانەبڕانیانە لە پڕۆسەی پەروەردە و فێركردن (قوتابخانە).”
بەڕێوەبەری كۆمەڵگەی دایك تیشكی خستەسەر مەرجەكانی وەرگرتن و گوتیشی: “مەرجەكانی وەرگرتن بریتین لەوەی، ك دەبێت خوازیار تەمەنی لە نێوان (5 بۆ 12) ساڵ بێت، خوازیار نابێت هیچ بەربەستێكی عەقلی و دەروونی هەبێت.”
داواش دەكات، كە بەمەبەستی ناو تۆماركردن سەردانی كۆمەڵگەی دایك بكەن لە دووسایدی ئازادی – نزیك بەرێوەبەرایەتیی پۆلیسی سۆران.