بەرپرسێكی كشتوكاڵی هەولێر رایدەگەیەنێت، لەبەرانبەر كڕینەوەی بنەتۆی گەنم، حكوومەت بڕی یەک ملیار و 513 ملیۆن دیناری بەسەر جووتیاراندا دابەش كرد.
هێمن سەید موراد، بەڕێوەبەری گشتیی كشتوكاڵی هەولێر، رایگەیاند: “ئەمساڵ هەزار و 754 تەن بنەتۆمان لە جووتیاران کڕییەوە، ئەمڕۆش 12ی ئەیلوول، شایستە داراییەکان بەسەر جووتیاراندا دابەش كرا“
ئاماژەی بەوەش دا: “ئەو گەنمە بە ئامانجی دابینکردنی بنەتۆ لە جووتیاران کڕابووەوە، ئەمڕۆ وەکوو پابەندبوونێک و ئەرکی حکوومەتی هەرێمی کوردستان، شایستە داراییەکانیان بۆ خەرج کرا.”
سەبارەت بە وردكاریی خەرجكردنی بڕەپارەكە، هێمن سەید موراد گوتی: “بڕی یەک ملیار و 513 ملیۆن دینار بەسەر جووتیاراندا دابەش كرا.”
بەڕێوەبەری گشتیی كشتوكاڵی ئەوەشی خستە ڕوو: “حكوومەتی عێراق تاوەكوو ئێستا دینارێكی بۆ كڕینەوەی بنەتۆ لە جووتیاران خەرج نەكردووە، بەڵام حكوومەتی هەرێمی کوردستان ئەوەی لەسەری بوو، كردی و مافی جووتیارانی دا و پارەكەی دابەش كرد.”
هێمن سەید موراد باسی لەوەش كرد، ئەو بنەتۆیە بەشێوەی پاڵپشتی لە لایەن حكوومەتی هەرێمی كوردستان بەسەر جووتیاراندا دابەش دەكرێت، گوتیشی: “ئەو بنەتۆیە تەنی بە 860 هەزار دینارمان كڕیوە، دواتر بە نرخی پاڵپشتیكراو، كە جارێ رانەگەیاندراوە، بۆ وەرزی داچاندن بەسەر جووتیاراندا دابەشی دەكەین.”