وەزیرى بەرگرى ئەمەریکا پشتیوانى وڵاتەکەى بۆ هێرشەکانى ئیسرائیل بۆسەر ژێرخانەکانى حیزبوڵاى لوبنان دەربڕى و جەختیشی کردوەتەوە کە ئەگەر ئێران هێرشبکاتەسەر ئیسرائیل روبەڕوى لێکەوتەى جددى دەبێتەوە.
لوید ئۆستن، وەزیرى بەرگرى ئەمەریکا لە لاپەڕەى تایبەتى خۆى لە تۆڕى کۆمەڵایەتیی ئێکس نوسیویەتى:” ئەمڕۆ لەگەڵ یواف گالانت، وەزیری بەرگری ئیسرائیل قسەم کرد بۆ تاوتوێکردنی پێشهاتە ئەمنییەکان و ئۆپەراسیۆنەکانی ئیسرائیل“.
ئاماژەى بۆ ئەوەکردوە کە لە پەیوەندییەکەدا بە رونى پشتگیریی ئەمەریکاى گەیاندوەتە ئیسرائیل بۆ بەرگریکردن لە خۆى و ئەم هێرشانەى ئیسرائیلیش بۆسەر ژێرخانى هێرشەکانى حیزبوڵا بە درێژایی سنورەکان بە پێویست ناودەبات و دەڵێت: پێویستە دڵنیا ببینەوە کە حیزبوڵا ناتوانێت هێرشى هاوشێوەى 7ـى تشرینى یەکەم بۆسەر ئیسرائیل ئەنجام بدات.
لە بەشێکى دیکەى راگەیەنراوەکەى وەزیرى بەرگرى ئەمەریکا جەختیش لەوە کراوەتەوە کە رێگە نادەن ئێران و ئەو رێکخراوانەى لەلایەن ئێرانەوە پاڵپشتى دەکرێن، ئەم هەلە بقۆزنەوە بۆ فراوانترکردنى گرژییەکان و ئەگەر ئێران بیەوێت هێرش بۆسەر ئیسرائیل ئەنجام بدات، روبەڕوى لێکەوتەى جددى دەبێتەوە.
ئەوەش لەکاتێکدایە، بەرەبەیانى ئەمڕۆ سوپاى ئیسرائیل لە باشورى لوبنان ئۆپەراسیۆنێکى دەستیپێکرد بەمەبەستى لەناوبردنى ژێرخانى حیزبوڵا بە درێژایی سنورەکان.