حەیدەر عەبادی، سەرۆکی هاوپەیمانی نەسر لە ڕاگەیێندراوێک دوای ڕووخانی رژێمی بەشار ئەسەد گوتی: رۆژێکی نوێیە لە سووریا، هیوادارین بۆ گەلەکەی رۆژی یەکگرتوویی، ئازادی، دادپەروەری و ئاشتیی بێت.
عەبادی دەڵێت، پێشتر گوتوومە ئەمڕۆش دەیڵێمەوە: وەک چۆن دیکتاتۆری نابێت بەردەوام بێت؛ بەهەمان شێوە تیرۆر، پشێوی و دابەشکارییش سەرکەوتوو نابێت.
ئاماژەی بەمەش کرد؛ هیواخوازە گەلی سووریا بە یەکگرتوویی، ئاسایش و پێکەوەژیانیی لەگەڵ خۆیان و جیهاندا ببینین.
بە گوتەی عەبادی، لە نێوان عێراق و سووریا هاوبەشیی گەورە هەن و دەکرێت بۆ هەردوو گەل ببنە هۆی خێر و بەرەکەت.
حکومەتی بەشار ئەسەد لەکاتێکدا بەرگەی هێرشی یەکهەفتەیی ئەم دواییەی دژبەرانی نەگرت، سەر لەبەیانیی ئەمڕۆ ٨ی تشرینی دووهەم، تابی نەهێنا و بە یەکجاری داکەوت.
ئێستا دوای ڕووخانی ڕژیمی سووریا گەڕان بە دوای سەرۆکی ڕاکردوودا بەردەوامە و نازانرێ سەرئەنجامی بە کوێ گەیشتووە، بەڵام هاکان فیدان وەزیری دەرەوەی تورکیا دەڵێت ئەو لە شوێنی بەشار ئەسەد ئاگادارە و ناتوانێت ئاشکرای بکات.