ئه‌مه‌ش ده‌قی په‌یامه‌كه‌یه:
پەیامی پیرۆزبایی مەکتەبی سیاسیی پارتی دیموکراتی کوردستان بەبۆنەی (72)یەمین ساڵیادی دامەزراندنی یەکێتیی ئافرەتانی کوردستان
بەڕێزان/ سکرتێر و ئەندامانی مەکتەبی سکرتاریەت و ئەنجوومەنی باڵای یەکێتیی ئافرەتانی کوردستان
ئەمڕۆ ساڵیادی دامەزراندنی یەکێتیی ئافرەتانی کوردستانە، ئەو ڕێکخراوەی بە بڕیار و ڕێنمایی
(بارزانیی نەمر) لە (١٩٥٢/١٢/١١) دامەزرا، دامەزراندنی ئەو ڕێکخراوە گرنگییەکی مێژوویی هەیە، چونکە وەرچەرخانێکی دەگمەن بوو لە بزووتنەوەی ڕزگاریخوازیی گەلەکەمان و تێکۆشانی نەپساوەی ڕۆڵەکانی گەلەکەمان بە گشتی و ئافرەتان بە تایبەتی.
یەکێتیی ئافرەتانی کوردستان، بزووتنەوەیەکی پڕ بایەخی گەلەکەمانە و یەکێکە لەو ڕێکخراوانەی توێژی ئافرەتان، کە ڕۆڵ و سەنگێکی کاریگەری هەبووە لە قۆناخە جیاجیاکانی تێکۆشانی نیشتمانی و نەتەوەییماندا.
لەلایەکی دیکەوە ئەو ڕێکخراوە بە درێژایی تەمەنی (٧٢)ساڵەی شکۆداری خۆی قوتابخانەیەکی پێگەیاندنی ئافرەتانی لە خۆبردوو و تێکۆشەر و دڵسۆز و سەرکردە بووە، بەمەش خزمەتێکی زۆری بواری پیشەیی و خەباتی مەدەنیانە و پەروەردەیی و ڕۆشنبیریی لە هه‌رێمی کوردستاندا کردووە.
یەکێتیی ئافرەتانی کوردستان لە کاروانی تەمەنی خۆیدا هەمیشە ڕێکخراوێکی پێشەنگ و بوێر بووە بۆ خستنەڕووی خواست و ویستی ئافرەتان و دەستەبەرکردنی یەکسانی و دادپەروەری کۆمەڵایەتی و پێشکەوتنی کۆمەڵایەتی و گەشەپێدانی هۆشیاریی و هزری نەتەوەیی و نیشتمانی و لەو ڕێگایەشدا قوربانی زۆری بەخشیوە، بۆیە هەمیشە مایەی شانازی و سەرفرازی گەلەکەمانن.
ئەو ڕێکخراوە بە پێی کارنامە و پرەنسیپ و پەیامی ڕاست و دروستی خۆی توانیویەتی بە شانازییەوە دەستکەوتی مەزن لە هەموو بوارەکاندا بۆ توێژی ئافرەتان دەستەبەر بکات، هەروەها لە هەموو کایەکانی ژیان و جومگە گرنگ و دامەزراوەکانی هه‌رێمی كوردستاندا ڕۆڵی شیاوی خۆیان ببینن بۆ سەلماندنی کەسایەتی خۆیان و داکۆکیکردن لەو ئەزموونە و پرۆسەی بونیاتنان و ئاوەدانکردنەوەدا.
ئەمڕۆیش لەو هەلومەرجە و قۆناغەی هەرێمدا پێویستە بە هەموو لایەک و هەموو چین و توێژەکانی کۆمەڵگەکەمان لەسەر ئاستی سیاسی و مەدەنی، بەرپرسانە و دڵسۆزانە هەوڵ بۆ پاراستنی ئەو ئەزموونە و سەقامگیریی و ئارامی و دەسکەوتەکانی بدەن.
بەو بۆنەیەوە گەرمترین پیرۆزبایی لە ئێوە و کادیر و ئەندامانی هێژای یەکێتییەکەتان و سەرجەم ئافرەتانی کوردستان دەکەین و دووبارە پاڵپشتی تەواوی خۆمان بۆ خواست و ویستی ئافرەتان دووپات دەکەینەوە، هیوادارین بۆ هەمیشە لە ئاست ئەو کار و ئەرک و پەیامە پیرۆزەتان بن بۆ داکۆکیکردن لە مافە ڕەواکانتان.
بەرزو پیرۆز بێت ساڵیادی دامەزراندنی یەکێتی ئافرەتانی کوردستان.
سڵاو و دروود بۆ گیانی پاک و بێگەردی شەهیدانی کاروانی شکۆداری یەکێتیی ئافرەتانی کوردستان و سەرجەم شەهیدانی کوردستان.
مەکتەبی سیاسیی
پارتی دیموکراتی کوردستان
١١ـی کانوونی یەکەمی ٢٠٢٤