وەزیری بەرگریی ئیسرائیل دەڵێت، ئێران هەوڵ دەدات لە ئوردنەوە بەرەیەکی دیکەی شەڕ لە سنووری ڕۆژهەڵاتی ئیسرائیل بکاتەوە و ئیسرائیلیش هەنگاوی پێویست بۆ پێشگرتن لەو هەوڵەی ئێران دەگرێتە بەر.
ئیسرائیل کاتز ئاماژەی بەوەش داوە، ئێران دەیهەوێت لە ڕێگەی قاچاغەوە چەک بگەیەنێتە کەناری ڕۆژئاوای ڕووباری ئوردن و بە دابینکردنی پێداویستیی داراییی تیرۆریزم لەو ناوچەیە نائەمنی بنێتەوە.
ئەمەش لە کاتێکدایە بنیامین ناتانیاهۆ، سەرۆکوەزیرانی ئیسرائیل ڕایگەیاندووە، بەهۆی ئەو گورزانەی ئیسرائیل لە ئێران و حزبوڵلای لوبنانی دا، ڕژێمی بەشار ئەسەد ڕووخا و ئەوەشی بە سەرکەوتنێکی گەورەی وڵاتەکەی بەسەر بەرەی مقاومەی سەر بە ئێراندا وەسف کردووە.
