وەزارەتی سامانە سروشتییەكانی حكوومەتی هەرێمی كوردستان، ڕوونكردنەوەیەكی بڵاو كردەوە و ئاماژە بەوە دەدات: “تاوەكوو ئێستا پشكی هەرێمی كوردستان لە نەوتی پاڵپشتیكراو لەلایەن وەزارەتی نەوتی عێراقەوە نەگەیشتووە.”
ئەمڕۆ یەكشەممە 12/1/2025، وەزارەتی سامانە سروشتییەكان، ڕوونكردنەوەیەكی بڵاو كردووەتەوە و ئاماژەی بەوە داوە: “بڕیارە لەم هەفتەیە لەلایەن وەزارەتی نەوتی عێراقی فیدراڵەوە بڕێک لە نەوتی سپی بۆ پارێزگاو ئیدارە سەربەخۆکان دابین بکرێت.”
ئەوەش خراوەتە ڕوو: “هاووڵاتیانی هەرێمی كوردستان ئاگادار دەكەینەوە، تاوەكوو ئێستا پشكی هەرێمی كوردستان لە نەوتی پاڵپشتیكراو لەلایەن وەزارەتی نەوتی عێراقەوە نەگەیشتووە، هەرچەندە بڕیارە لەم هەفتەیەدا لەلایەن وەزارەتەكەوە بڕێک لە نەوتی سپی بۆ پارێزگا و ئیدارە سەربەخۆکانی هەرێمی کوردستان دابین بکرێت كە زۆر كەمترە لە پشكی هەرێمی كوردستان و تەنیا بەشی لە 19%ی پێویستیی خێزانەکانی هەرێمی کوردستانە، ئەگەر ئەم بڕە نەوتەش دابین کرا، بە چەند كاروانێک دەگاتە هەرێمی كوردستان و ڕاستەوخۆ لە ڕێگای بەڕێوەبەرایەتییەکانی نەوت و کانزاکانەوە و بە هەماهەنگی لەگەڵ پارێزگاکان و ئیدارە سەربەخۆکان لە هەرێمی کوردستان، دەست بە دابەشکردن دەکرێت.”