وەزارەتی ناوخۆی هەرێمی كوردستان ئەمڕۆ چوارشەممە كردنەوەی پۆرتاڵێكی نوێی بۆ بەڕێوەبەرایەتییەكانی هاتوچۆ راگەیاند كە بەهۆیەوە هاووڵاتییان دەتوانن لە ماڵەوە فۆڕمی بەناوكردنی ئۆتۆمبێل و نوێكردنەوەی مۆڵەتی شوفێری پڕ بكەنەوە.
ئەمڕۆ چوارشەممە لە بەڕێوەبەرایەتی هاتوچۆی پارێزگای دهۆک ساڵیانەی ئۆتۆمبێل بە سیستمی نوێ دەست بەکار بوو، ئەم پڕۆژەیە بە ستانداردی جیهانی لەلایەن وەزارەتی ناوخۆ و کۆمپانیای ناوداری ئەڵمانی جێبەجی دەکرێت و پڕۆژەکە بۆ ئاسانکردنی کاروباری هاووڵاتییان و بە ئەلیکترۆنیکردنی خزمەتگوزارییەکانە و ڕاستەوخۆ لەلایەن مەسرور بارزانی سەرۆک وەزیرانەوە پاڵپشتی و چاودێری جێبەجێکردنی کراوە.
لە کۆنگرەیەکی رۆژنامەوانیدا، عەلی تەتەر پارێزگاری دهۆك و هێمن میرانی بەڕێوەبەری گشتی وەزارەتی ناوخۆ باسیان لە بایەخی ئەم پڕۆژە نوێیە کرد کە لەمەولا ساڵیانەی نوێی ئۆتۆمبێل کە خاوەندارێتی ئۆتۆمبێلە و گواستنەوەی خاوەندارێتی و هەموو کەیسەکانی دیکە بە سیستمی نوێ جێبەجێ دەکرێن و دەکیومێنتی نوێی ساڵیانە هاوشێوەی مۆڵەتی نوێی شوفێری دەردەهێندرێت.
ساڵیانەکە بە تەکنۆلۆژیای پێشکەوتووی سەردەم بەرهەم دەهێندرێ و بایۆمەتری خاوەنەکەی دەخرێتە ناوی بۆ ئەوەی لە هەموو جۆرە ساختەکارییەک بپارێزرێت.
لە کۆنگرە رۆژنامەوانییەکە باس لەوەش کرا کە ئەو سیستمە نوێیە پۆرتاڵێکی نوێی بۆ دروست کراوە بەم ناونیشانە (https://dlvr.digital.gov.krd ) و هاووڵاتییان لەمەولا دەتوانن هەژمار بۆ خۆیان دروست بکەن و بۆ گواستنەوەی خاوەندارێتی و بەشێکی مامەڵەکان لە ماڵەوە ئەنجام بدەن و فۆرمەکانیان پڕ بکەنەوە بۆ ئەوەی بە کاتێکی کەمتر و خێراتر مامەڵەکانیان لە بەڕێوەبەرایەتییەکانی هاتوچۆ بەڕێوەبچێت.
ئەم پۆرتاڵە هەروەها دەتوانرێت بۆ نوێکردنەوەی مۆڵەتی شوفێریش بەکار بهێندرێت.
ساڵیانەی نوێ لە دهۆک دەستی پێ کرد و لە ئایندەییەکی نزیکدا لە بەڕێوەبەرایەتییەکانی دیکەی هاتوچۆ لە پارێزگا و ئیدارە سەربەخۆکانیش دەست پێ دەکات.
جەختیش لەوە كرایەوە كە شوفێران و خاوەنی ئۆتۆمبێلەکان لە ئێستاوە دەتوانن سەردانی ئەو پۆرتاڵەی سەرەوە بکەن و هەژماری تایبەت بە خۆیان دروست بکەن بۆ ئەوەی لەمەولا مامەڵەکانی تایبەت بە مۆڵەتی شوفێری و گواستنەوەی خاوەندارێتی ئۆتۆمبێلەکانیان لە ڕێی پۆرتاڵەوە لە ماڵەوە دەست پێ بکەن.