دەستەی پەخشی ئیسرائیل بڵاوی کردەوە، هێزی ئاسمانی ئیسرائیل مانۆڕێکی بەرفراوانی کردووە، کە لەمانۆڕەکەدا مووشەکی بەکار هێناوە ئەمەش وەکوو ئامادەکارییە لەئەگەری شکست هێنانی دانوستانەکانی ئەمەمریکا و ئێران.
ڕۆژی دووشەممە، بەهۆی مانۆڕەکە و تەقینەوەکانەوە ئیسرائیلییەکان ترساوون، هەروەها گوتەبێژی سوپای ئیسرائیلیش دڵنیایی دایە خەڵک کە هیچ ڕووداوێکی ئەمنی نییە، بەڵکو مەشق و ڕاهێنانە لە بنکەیەکی نزیک شوێنی دانیشتووان، بەبێ ئەوەی شوێنەکە ئاشکرا بکات.
دەستەی پەخشی ئیسرائیل، ڕایگەیاندووە، مانۆڕەکان لەسەر ئەو بنکانە چڕبوونەتەوە کە پێشتر لە ئۆکتۆبەری 2024 و لەلایەن هێرشەکانی ئێرانەوە هێرشیان کراوەتە سەر، وەک نەڤاتیم و حاتسۆر.
بەگوێرەی ڕاپۆرتی دەستەی پەخشی ئیسرائیل، ئامانج لەو مانۆڕە بەرزکردنەوەی ئامادەیی ئۆپەراسیۆنی سیستەمی بەرگری و وەڵامدانەوەی هێزی ئاسمانی بووە، ئەمەش وەک ئامادەکارییەک بۆ سیناریۆیەکی ئەگەری کە تێیدا ئەگەر گفتوگۆکانی نێوان واشنتۆن و تاران شکست بێنن، ئەوە ئۆپەراسیۆن و شەڕ دەست پێدەکات.
ئەم مانۆڕانە لە دوای ڕاپۆرتێکی نیویۆرک تایمز دێت، کە هەفتەی ڕابردوو پلانێکی ئیسرائیل-ئەمەریکای بۆ هێرشکردنە سەر ئێران ئاشکرا کرد، بەڵام پلانەکە لەلایەن دۆناڵد ترەمپ سەرۆکی ئەمەریکا پووچەڵکرایەوە.
تەلئەڤیڤ دانوستانەکانی ئەمەریکا و ئێران بەهەوڵێک دەزانێت بۆ زیاتر فشار خستنە سەر ئێران، ئەمەش وەک ئامادەکاریی بۆ بەردەوامی دانوستانەکانی نێوان هەر دوو لا دەربارەی بەرنامەی ئەتۆمیی تاران.