ژان نۆئێل بارۆ، وەزیری دەرەوەی فەرەنسا ڕایگەیاند، وڵاتەکەی نێوەندگیری لەنێوان کوردانی باکوور و ڕۆژهەڵاتی سووریا و دەسەڵاتدارانی تورکیادا دەکات و داوایان لێدەکەن گرژییەکان کەم بکەنەوە. هاوکات جەختیشی کردەوە، دەبێت کورد لە سووریای نوێدا خاوەن ناسنامە و مافی یەکسان بێت.
وەزیری دەرەوەی فەرەنسا لە لێدوانێکدا گوتی: «ئێمە نێوەندگیریمان لەنێوان کوردانی باکوور و ڕۆژهەڵاتی سووریا و دەسەڵاتدارانی تورکیادا کردووە و داوا لە تورکیا دەکەین هانی کەمکردنەوەی گرژییەکان بدات و کۆتایی بە دۆخی شەڕ بهێنێت.»
بارۆ ئاماژەی بەوەش دا، ڕووخانی ڕژێمی ئەسەد هیوایەکی گەورەی دروست کردووە و پێویستە لە سووریای نوێدا کورد وەک هاووڵاتییەکی یەکسان بەشداریی کارا لە بنیادنانەوەی وڵاتەکەیدا بکات. جەختیشی کردەوە: «پێویستە کورد خاوەنی ناسنامەی خۆی بێت و مافە کولتوورییەکانی بە فەرمی بناسرێن.»
سەبارەت بە ڕێککەوتنی نێوان دەسەڵاتی نوێی سووریا و هێزەکانی سووریای دیموکرات (هەسەدە)، وەزیری دەرەوەی فەرەنسا بە هەنگاوێکی ئەرێنیی سەرەتایی وەسفی کرد و گوتیشی: «فەرەنسا بەردەوام دەبێت لە پشتیوانیکردنی دانوستانەکان بۆ جێبەجێکردنی تەواوەتیی ئەم ڕێککەوتنە، چونکە یەکگرتنەوەی سووریا و یەکڕیزیی کوردەکان ئامانجێکی ستراتیژییە.»