ئۆرسۆلا ڤۆندەرلاین، سەرۆکی کۆمسیۆنی یەکێتیی ئەورووپا، ڕایگەیاند ئیسرائیل مافی بەرگریکردن لە خۆی هەیە و جەختی کردەوە کە ئێران سەرچاوەی ناسەقامگیریی ناوچەکەیە و نابێت ببێتە خاوەنی چەکی ئەتۆمی.
ڤۆندەرلاین ئاشکرای کرد کە لە پەیوەندییەکی تەلەفۆنیدا لەگەڵ بنیامین ناتانیاهۆ، سەرۆک وەزیرانی ئیسرائیل، پابەندبوونی یەکێتیی ئەورووپای بە ئاشتی و سەقامگیری لە ڕۆژهەڵاتی ناوەڕاست دووپات کردووەتەوە و گوتوویەتی: “لەم چوارچێوەیەدا، ئیسرائیل مافی تەواوی هەیە بەرگری لە خۆی بکات.”
سەرۆکی کۆمسیۆنی ئەورووپا هەروەها گوتی: “ئێمە هەمیشە ڕاشکاو بووین کە نابێت ئێران چەکی ئەتۆمی بەدەست بهێنێت. چەندین جار نیگەرانیی خۆمان لەبەرانبەر بەرنامە ئەتۆمییەکەی و مووشەکە بالیستییەکانی دەربڕیوە.”
ناوبراو ڕێگەچارەی دیپلۆماسی بە باشترین ڕێگا بۆ چارەسەرکردنی نیگەرانییەکان لەسەر بەرنامە ئەتۆمییەکەی ئێران زانی و دووپاتی کردەوە کە ئەورووپا پابەندە بە دۆزینەوەی چارەسەرێکی هەمیشەیی لە ڕێگەی دانوستان و ڕێککەوتنەوە.
ئەم لێدوانانەی ڤۆندەرلاین لە کاتێکدایە کە گرژییەکانی نێوان ئێران و ئیسرائیل گەیشتووەتە ئاستێکی مەترسیدار، بەتایبەتی دوای هێرشەکەی ئیسرائیل بۆ سەر کونسوڵخانەی ئێران لە سووریا و وەڵامدانەوە سەربازییەکەی ئێران.