گوتەبێژی دەسەڵاتی دادوەریی ئێران ڕایگەیاند، بەپێی نوێترین ئامار، لە ئەنجامی شەڕی ١٢ ڕۆژەی نێوان ئێران و ئیسرائیل، ٩٣٥ هاووڵاتیی ئێرانی گیانیان لەدەست داوە، کە لەنێویاندا ژن و منداڵ هەبوون.
ئەسغەر جەهانگیر، گوتەبێژی دەسەڵاتی دادوەریی کۆماری ئیسلامیی ئێران ڕایگەیاند، ژمارەی ئەو هاووڵاتییە ئێرانییانەی لە شەڕی ١٢ ڕۆژەی نێوان وڵاتەکەی و ئیسرائیلدا گیانیان لەدەست داوە، گەیشتووەتە ٩٣٥ کەس.
جەهانگیر ڕوونیشی کردەوە، بەپێی دوایین ئاماری پزیشکیی دادی ئێران، لەنێو کوژراوەکاندا ٣٨ منداڵ و ١٠٢ ژن هەن و ژمارەیەک لە ژنەکانیش دووگیان بوون.
ناوبراو ئاماری قوربانییانی سەربازی و مەدەنیی لێک جیا نەکردەوە و ئاشکرای نەکرد چەند کەس لە کوژراوەکان سەر بە هێزە چەکدارەکان بوون.