باڵیۆزخانەی ئەمریکا لە بەغدا دەڵێت، لە بەغدا و کونسوڵخانەی گشتی لە هەولێر کراوەن و وەک هەمیشە کاردەکەن، پابەندن بە پێشخستنی ئەولەویەتەکانی سیاسەتی ئەمریکا لە عێراق و پاڵپشتیکردنی سەروەری وڵاتەکە.
وتەبێژی باڵیۆزخانە بە شەفەق نیوزی راگەیاند، “لە پێناو سەلامەتی هەمووان و بەهۆی پەرەسەندنی گرژییەکانی ناوچەکه، نوێنەرایەتی ئەمریکا لە عێراق لە 12ی حوزەیرانەوە بە سیستەم ناردنەوەی بەشێک لە کارمەندەکانی دەستیپێکرد”. ئاماژەی بەوەشکرد، “لە چوارچێوەی هەوڵە بەردەوامەکانمان بۆ رێکخستنی کارەکانمان، کارمەندی زیادە لە 21ی حوزەیران عێراقیان جێهێشت. ئەم پرۆسەیەش بەهۆی ئەو رووداوانه بوو کە لە 12ی حوزەیران دەستیپێکرد”.
روونیشیکردەوە: “ناردنەوەی کارمەندەکان کاتییە و باڵیۆزخانەکەمان بە هۆکاری ئەمنی باس لە ژمارەی کارمەندان ناکات”.