فوئاد حوسێن جێگری سەرۆک وەزیران و وەزیری دەرەوەی عێراق ئەمڕۆ لەگەڵ بەرپرسی کاروباری باڵیۆزخانەی ئەمریکا لە عێراق، ستیڤن فگین کۆبووەوە و تاوتوێی ئاستەنگە داراییەکانی نێوان حکومەتی فیدراڵی و حکومەتی هەرێمی کوردستان و بەڕێوەبردنی نەوت لە کێڵگەکانی هەرێمیان کرد.
وەزارەتی دەرەوەی عێراق لە بەیاننامەیەکدا ئاماژەی بەوەکردووە، لە کۆبوونەوەکەدا هەردوولا دوایین پێشهاتە سیاسییەکانی عێراقیان تاوتوێ کردووە، بەتایبەتی پەیوەندی نێوان حکومەتی فیدراڵی و حکومەتی هەرێم، بەتایبەت ئاستەنگە داراییەکان و پرسە پەیوەندیدارەکان.
بەگوێرەی ڕاگەیەندراوەکە، هەردوولا باسیان لە دۆخی کۆمپانیا ئەمریکییەکان کردووە کە لە هەرێمی کوردستان کاردەکەن و پەیوەندییەکانی نێوان بەغدا و هەولێر سەبارەت بە بەڕێوەبردنی نەوت لە کێڵگەکانی ناو هەرێم. فوئاد حوسێن جەختی لە گرنگی گەیشتن بە چارەسەری واقیعی کردەوە کە ئیدارەی دادپەروەرانەی سامانە نیشتمانییەکان مسۆگەر بکات و سوودی گشتیت عێراق بەدەست بێنێت.
لە میانی دیدارەکەدا فوئاد حوسێن پەرۆشی حکومەتی عێراقی دووپاتکردەوە بۆ پتەوکردنی هاریکاری لەگەڵ ئەمەریکا لە بوارە جیاجیاکان و پاڵپشتیکردنی سەقامگیری سیاسی و ئابووری وڵات که خزمەت بە بەرژەوەندی هاوبەشی نیشتمانی دەکات.