سەرچاوە جیاوازەكان لە عێراق باس لە ئەگەری بڵاوبوونەوەی هەژارییەكی گەورە لە وڵاتەكە دەكەن، پسپۆڕێكی ئابووریش رایدەگەیەنێت كە كۆمپانیای بەبازاڕكردنی نەوتی عێراق (سۆمۆ) لەژێر مەترسیی ئەوەیە بخرێتە لیستی سزاكانی ئەمریكاوە.
عزەت شابەندەر، سیاسەتمەداری عێراقی لە لێدوانێكدا داوای لە عێراقییەكان كردووە، خۆیان بۆ گەمارۆ و قاتوقڕی ئامادە بكەن و پێویستییەكانی مانەوە لە ژیان دابین بكەن.
لە لایەن خۆیەوە نەبیل مەرسوومی، ئابووریناسی عێراقی لە پێگەی خۆی لە تۆڕی كۆمەڵایەتیی (فەیسبووك) دەڵێت: ”ئەو قسانەی شابەندەر لە یەكێك لەم سێ حاڵەتە دێتە دی: یەكەم، ئەگەر ئێران گەرووی هورمز دابخات. دووەم، ئەگەر ویلایەتە یەكگرتووەكانی ئەمریكا سزایەك دابنێت كە بەهۆیەوە هەناردەكردنی نەوتی عێراق بوەستێت. سێیەم، ئەگەر ئیسرائیل بەندەرە نەوتییەكانی عێراق وێران بكات.“