سەرۆکی لیژنەی مافی مرۆڤی پەرلەمانی عێراق، ئەرشەد ئەلساڵحی، رایگەیاند، “تێپەڕاندنی ئەم یاسایە پێچەوانەی بنەماکانی ئازادی رادەربڕین و تێکدانی بنەمای ئازادی رادەربڕین و خۆپیشاندانه، لەوانەش مەرجی رەزامەندی پێشوەختە بۆ خۆپیشاندان و بەکارهێنانی دەستەواژەی وەک تێکدانی نەزم و ئەخلاقی گشتی، کە لیژنەکە بە یەکجاری رەتیکردەوە.”
ئاماژەی بەوەشکرد، “بە پشتبەستن بەو پێشمەرجە، لیژنەی مافی مرۆڤ کاریان کرد بۆ دووبارە داڕشتنەوەی یاساکە بەشێوەیەک کە کرۆکی خۆپیشاندانی ئاشتیانە بپارێزێت و رێگری لە هەر پێشێلکارییەک بکات بەرامبەر خۆپیشاندەران. لە گرنگترین هەموارکردنەکانی لیژنەکە بۆ ڕەشنووسی یاساکە هەڵوەشاندنەوەی مەرجی وەرگرتنی مۆڵەتی پێشوەختە بۆ خۆپیشاندان و گۆڕینی بەتەنها بۆ ئاگادارکردنەوەیەک بۆ سەرۆکی یەکەی کارگێڕی، وەک پاڵپشتی لە ئازادیی خۆپیشاندەران.”
راشیگەیاند: لیژنەکە ناونیشانی یاساکەی لە “ئازادی ڕادەربڕین و خۆپیشاندانی ئاشتیانە”ەوە گۆڕی بۆ “یاسای خۆپیشاندان و گردبوونەوە”، چونکە ئازادی رادەربڕین که لە ئێستاوە بە دەستوور گەرەنتی کراوە و ناتوانرێت بە یاسایەکی ورد و سنووردار رێکبخرێت جگە لەوەش لیژنەکە ئەو بڕگانەی لابردووە کە سزای تاوانکاریی زیادەڕۆیی لەخۆدەگرێت، کە لە پێنج ساڵ زیندانەوە دەستپێدەکات، بە لەبەرچاوگرتنی ئەوەی کە یاسای سزادانی عێراقی توانای مامەڵەکردنی لەگەڵ هەر پێشێلکارییەکدا هەیە، ئەگەر ڕووبدات.”
ساڵحی لە درێژەی قسەکانیدا گوتی، “هەموارکردنەکان بریتی بوون لە دانانی بڕگەیەکی نوێ کە رێگە دەدات خۆپیشاندانێک بگۆڕدرێت بۆ مانگرتن، کە لە رەشنووسی یاسای سەرەکی بەردەست نەبوو. ئەمەش نوێنەرایەتی دەستکەوتێکی بەرچاو دەکات بۆ مافە مەدەنییەکان. هەروەها هەموارکردنەکان بەکارهێنانی تەقەمەنیی قەدەغە کردووە، جەخت لەسەر قەدەغەکردنی هەر جۆرە دەستدرێژییەک بۆ سەر خۆپیشاندەرانی ئاشتیانە بە هەر بیانوویەک کراوە، هەروەها بڕگەیەکی نوێی زیادکرا کە رێگە بە میدیا دەدات بێ بەربەست رووماڵی خۆپیشاندانەکان بکەن.”
ئەلساڵحی ئاماژەی بەوەدا: “لیژنەکە دووپاتی دەکاتەوە خۆپیشاندانی ئاشتیانە بە مانای دەستدرێژیکردنە سەر موڵک و ماڵی گشتی یان تایبەت نییە و ئەمەش دەبێت بەڕوونی لە هەڵسوکەوتی هەموو بەشداربووانی هەر بزووتنەوەیەکی مەدەنیدا رەنگ بداتەوە.”
روونیشیکردەوە، “لیژنەکە بڕیاری کشانەوەی رەشنووسی یاساکەی داوە بەمەبەستی پاراستنی ئەو پرەنسیپانەی کە باوەڕمان پێیانە، لەپێشترینیاندا ئەوەیە کە خەڵک سەرچاوەی دەسەڵاتە. بەڵام ئێمە مافی دەستووری خۆمان دەپارێزین کە لە داهاتوودا دووبارە بیخەینە بواری جێبەجێکردنەوە، بەشێوەیەک رێز لە مافەکان بگرێت و سیستەم بپارێزێت.”