کۆمپانیا چەکسازییەکانی ئیسرائیل لە بەشداریکردن لە یەکێک لە گەورەترین پێشانگا فڕۆکەوانییەکانی جیهان لە میرنشینە یەکگرتووەکانی عەرەبی بێبەش کران.
ئەم بڕیارە لە کاتێکدایە تووڕەییی گشتی لە وڵاتانی کەنداو بەرانبەر هێرشەکانی ئیسرائیل بۆ سەر غەززە و هەروەها هێرشە بێوێنەکەی ئەو وڵاتە بۆ سەر قەتەر زیادی کردووە.
بەپێی زانیارییەکانی بەرپرسێکی باڵا کە نەیویست ناوی ئاشکرا بکرێت، ڕێکخەرانی پێشانگای ئاسمانیی دوبەی، کە بڕیارە لە مانگی تشرینی دووەم بەڕێوە بچێت، لە ڕێگەی نامەیەکەوە بە چەند کۆمپانیایەکی ئیسرائیلییان ڕاگەیاندووە بۆ ساڵی ٢٠٢٥ ڕێگەیان پێ نادرێت بەشداری لەو بۆنەیەدا بکەن.
هێرشە بێوێنەکەی ئیسرائیل لە ڕۆژی ٩ی ئەیلوول بۆ سەر دۆحە، کە سەرکردە سیاسییەکانی حەماسی کردە ئامانج، بووە هۆی تووڕەیی قەتەر و سەرکردەکانی دیکەی ناوچەی کەنداو.