پاکستان و سعوودیه پەیمانێکی بەرگرییان واژۆ کرد. بەپێی پەیمانەکە، هەر دەستدرێژییەک بۆ سەر هەر یەکێک لەم دوو وڵاتە، بە کارێکی دوژمنکارانە بەرانبەر هەردووکیان هەژمار دەکرێت. ئەم ڕێککەوتنە بەرگرییەی نێوان سعوودیه و پاکستان، کە خاوەنی چەکی ئەتۆمییە، هاوکارییە ئەمنییەکانی نێوانیان بە شێوەیەکی بەرچاو بەهێزتر دەکات، لە کاتێکدا گرژییەکان لە ناوچەکەدا ڕوویان لە زیادبوون کردووە.
شەهباز شەریف، سەرۆکوەزیرانی پاکستان، لە میانی سەردانەکەیدا بۆ سعوودیه، “ڕێککەوتنی ستراتیژیی بەرگریی هاوبەش”ی واژۆ کرد.
لە بەیاننامەیەکی هاوبەشدا هاتووە، ئەم پەیمانە لەسەر بنەمای “یەکڕیزیی ئیسلامی و بەرژەوەندییە ستراتیژییە هاوبەشەکان” داڕێژراوە. نووسینگەی سەرۆکوەزیرانی پاکستان لە بەیاننامەیەکدا ڕایگەیاند: “ئەم ڕێککەوتنە نیشاندەری پابەندبوونی هاوبەشی هەردوو وڵاتە بۆ بەهێزکردنی ئاسایشی خۆیان و بەدەستهێنانی ئاسایش و ئاشتی لە ناوچەکە و جیهاندا. ئامانج لێی پەرەپێدانی هاوکاریی بەرگری و بەهێزکردنی توانای بەرپەرچدانەوەی هاوبەشە بەرانبەر هەر دەستدرێژییەک. بەپێی ڕێککەوتنەکە، هەر دەستدرێژییەک بۆ سەر یەکێک لەم دوو وڵاتە، بە دەستدرێژی بۆ سەر هەردوو وڵاتەکە هەژمار دەکرێت.”
سعوودیه نەوتی هەرزان و هاوکاریی دارایی پێشکەش بە پاکستان دەکات. چاودێران دەڵێن هەردوو وڵات نیگەرانییان لە هەژموونی هەرێمیی ئێران هەیە و هەوڵ دەدەن هاوسەنگییەک بەرانبەر هێزەکانی وەک هیندستان و ئیسرائیل دروست بکەن.
ئەم ڕێککەوتنە ئەمنییە لە کاتێکدایە کە وڵاتانی عەرەبیی کەنداو زیاتر لە جاران گومانیان لەوە هەیە کە بتوانن پشت بە ئەمەریکا ببەستن وەک پارێزەری ئاسایشیان. هێرشەکەی ئیسرائیل بۆ سەر قەتەر ئەم نیگەرانییانەی زیاتر کردووە.
بەرپرسێکی باڵای سعودی لەبارەی کاتی ڕێککەوتنەکەوە بە ڕۆیتەرزی گوت: “ئەم ڕێککەوتنە بەرهەمی چەندین ساڵ گفتوگۆیە. ئەمە وەڵامێک نییە بۆ وڵاتێکی دیاریکراو یان ڕووداوێکی تایبەت، بەڵکوو چەسپاندنی هاوکارییەکی قووڵ و مێژوویی نێوان هەردوو وڵاتە.”
هەوڵی ئیسرائیل بۆ کوشتنی سەرکردە سیاسییەکانی حەماس لە ڕێگەی هێرشی ئاسمانییەوە بۆ سەر دۆحە – لە کاتێکدا ئەوان خەریکی تاوتوێکردنی پلانێکی ئاگربەست بوون بە نێوەندگیریی قەتەر – وڵاتانی عەرەبی تووڕە کرد.
ڕاندیر جایسواڵ، گوتەبێژی وەزارەتی دەرەوەی هیندستان، ڕۆژی پێنجشەممە لە پۆستێکدا لە تۆڕی کۆمەڵایەتیی ئێکس گوتی: “هیندستان ئاگاداری ئەم پێشهاتەیە و دێلهی لێکەوتەکانی بۆ سەر ئاسایشی هیندستان و سەقامگیریی ناوچەکە تاوتوێ دەکات.”
بەرپرسێکی باڵای سعودی کە نەیویست ناوی ئاشکرا بکرێت، بە ڕۆیتەرزی گوت، پێویستە سعوودیه هاوکات لەگەڵ بەهێزکردنی پەیوەندییەکانی لەگەڵ پاکستان، هاوسەنگی لەگەڵ هیندستانیشدا ڕابگرێت. ناوبراو گوتی: “پەیوەندییەکانمان لەگەڵ هیندستان ئێستا لە هەموو کاتێک بەهێزترە. بەردەوام دەبین لە گەشەپێدانی ئەم پەیوەندییە و بە هەر شێوەیەک بتوانین بەشداری لە ئاشتیی هەرێمیدا دەکەین.”
لە وەڵامی ئەو پرسیارەی ئایا بەپێی ئەم پەیمانە پاکستان پابەند دەبێت بە دابینکردنی چەتری بەرگریی ئەتۆمی بۆ سعوودیه، بەرپرسەکە گوتی: “ئەمە ڕێککەوتنێکی بەرگریی گشتگیرە و هەموو ئامرازە سەربازییەکان لەخۆ دەگرێت.”