یەکشەممە، 21-9-2025، د. شاخەوان عەبدوڵڵا، جیگری سەرۆکی پەرلەمانی عێراق لە کۆنگرەیەکی ڕۆژنامەوانیدا ڕایگەیاند، بەداخەوە تاوەکوو ئێستا بەغدا سێ مانگە مووچەی مووچە خۆرانی هەرێمی کوردستانی نەناردووە.
شاخەوان گوتی: گواستنەوەی مامۆستایان لە چوارچێوەی بودجەدا نەبووە، بەڵام دەسەڵاتی خۆمان وەکوو سەرۆکایەتی بەکارهێنا بە گواستنەوەی 15 هەزار و 900 فەرمانبەر و مامۆستای ناوچەکانی دەرەوەی ئیدارەی هەرێمی کوردستان بۆ سەر بەغدا، بەڵام بیری شۆڤێنی ئەوەندە زاڵ بەسەریاندا ئەو گواستنەوەیان بەڕەوا نەبینی و دەنگیان لەسەر نەدا. بەڵام بچینەوە پەرلەمان بەجددی کاری لەسەر دەکەین.
ڕاشیگەیاند، ڕێککەوتنی نەوتی و نانەوتی و خەرجکردنی مووچەی مووچە خۆرانی هەرێمی کوردستان کراوە، ئاماژەی بەوەشکرد، پرۆپۆزەلی ڕێککەوتنی نوێی نێوان تورکیا و عێراق کۆتایی هاتووە لەنێوان کۆمپانیای سۆمۆ و کۆمپانیا تورکیەکان بۆ گواستنەوەی نەوتی هەرێمی کوردستان.
شاخەوان عەبدوڵڵا باسی لەوەش کرد، هیچ پابەندییەک نەماوە، تەنیا ماوەتەوە حکوومەتی عێراق پابەندییە ئەخلاقیی و یاساییەکانی بەرانبەر بەو ڕێککەوتنەی لە چەند ڕۆژی ڕابردوو بۆ ناردنی مووچە کراوە جێبەجێ بکات.