بەرەبەیانی ڕۆژی چوارشەممە، ٢٤ی ئەیلوول، کاتژمێر ٦:٤٠ خولەکی بەیانی بە کاتی ناوخۆ، گەنجێکی ٢٩ ساڵان بە ناوی جۆشوا جان، لە سەربانی باڵەخانەیەکەوە لە نزیک نووسینگەی بەڕێوەبەرایەتیی کۆچ و گومرگی ئەمریکا (ICE) لە شاری داڵاس، دەستڕێژی گوللـەی کرد. لە ئەنجامی ئەم هێرشەدا، یەکێک لە دەستبەسەرکراوانی کۆچبەر کوژرا و دوو کەسی دیکەش بریندار بوون. هێرشکارەکە دواتر خۆی کوشت. بەرپرسان ڕووداوەکەیان بە “توندوتیژیی ئامانجدار” وەسف کردووە.
دوو بریندارەکەی هێرشەکە بە هۆی سەختیی برینەکانیانەوە گەیەنرانە نەخۆشخانە و لەژێر چاودێریی چڕدان. لە شوێنی ڕووداوەکە، فیشەک دۆزراونەتەوە کە دەستەواژەی “ANTI-ICE” (دژ بە ئایس)یان لەسەر نەخشێنرابوو، کە ئاماژەیە بۆ پاڵنەری سیاسیی هێرشکارەکە.
نووسینگەی لێکۆڵینەوەی فیدراڵی (FBI) ئەم هێرشەی بە “ئامانجدار” ناوبردووە و لێکۆڵینەوەکانی لەسەر پاڵنەرە سیاسییەکان چڕ کردووەتەوە. جۆزێف ڕاسراک، بەرپرسی تایبەتی ئێف بی ئای لەم بارەیەوە بە میدیاکانی ڕاگەیاندووە: “ئەم هێرشە بەشێکە لە مۆدێلێکی جێگەی نیگەرانیی توندوتیژیی سیاسی.”
پۆلیسی داڵاس و بەرپرسانی فیدراڵی بەردەوامن لە پشکنینی بەڵگەکان، لەوانە ئەو گوللـانەی بەر ئاڵای ئەمریکا کەوتوون لە حەوشەی باڵەخانەکەدا.
دۆناڵد ترەمپ، سەرۆکی ئەمریکا، ئەم هێرشەی خستە ئەستۆی “دیموکراتە چەپە ڕادیکاڵەکان” و ئیدعای کرد کە “گوتاری دژ بە ئایسی ئەوان هانی توندوتیژی دەدات.” کریستی نۆئم، وەزیری ئاسایشی ناوخۆ، ڕەخنەی لە دیموکراتەکان گرت بەهۆی “ناوزڕاندنی” کارمەندانی ئایس. بەڵام برای هێرشکارەکە بە کەناڵی “ئێن بی سی نیوز”ی گوتووە کە جۆشوا “ئارەزووی لە سیاسەت نەبووە.”
