ئێریک کامووسۆ، ڕاوێژکاری ئابووری لە باڵوێزخانەی ئەمریکا لە بەغدا، ئەمڕۆ یەکشەممە ٢٨-٠٩-٢٠٢٥ هۆشداریی دا لەوەی میلیشیا چەکدارەکان لە عێراق بوونەتە مەترسی بۆ سەر وەبەرهێنەران و ڕێگرن لە چالاکیی بازرگانی.
كامووسۆ لە کۆنفڕانسی وەبەرهێنانی عێراقدا باسی لەوە کرد، لەکاتێکدا کە دۆخی ئاسایشی عێراق سەلامەتترە و بەراورد بە ١٥ ساڵ لەمەوبەر باشتر بووە، بەڵام میلیشیا چەکدارەکان هێشتا چالاکن و وەبەرهێنان لە سەرانسەری وڵاتەکە سست دەکەن.
کامووسۆ جەختی لەسەر ئەوە کردەوە: “ئەمریکا بەردەوامە لە پشتگیریکردنی عێراق لە ڕێگەی پاڵپشتیکردنی دەرفەتەکانی وەبەرهێنانی بیانی و پاراستنی بازرگانان و وەبەرهێنەران بۆ دڵنیایی لە سەرکەوتنیان لە وڵاتەکە.”
شیاوی باسە، ئەم لێدوانە دوای ئەوە دێت، کە ئەمریکا لەم دواییەدا چوار گرووپی میلیشیای عێراقیی وەک (ڕێکخراوی تیرۆریستیی بیانی) دەستنیشان کردووە.