نیوه‌ڕۆی ئه‌مڕۆ پێنجشه‌ممه 4/4/2024 به‌ڕێز نێچیرڤان بارزانی سه‌رۆكی هه‌رێمی كوردستان، له كۆبوونه‌وه‌یه‌كیدا له‌گه‌ڵ جه‌نه‌راڵ جۆول ڤاوڵ فه‌رمانده‌ی گشتیی هێزه‌كانی هاوپه‌یمانان له عێراق و سووریا و شاندێكی یاوه‌ری، دۆخی ئه‌منی و سه‌ربازیی ناوچه‌كه و هاوكاری و هه‌ماهه‌نگیی هاوبه‌شیان، تاوتوێ کرد.
له كۆبوونه‌وه‌كه‌دا كه به‌ڕێز شۆڕش ئیسماعیل وه‌زیری كاروباری پێشمه‌رگه ئاماده بوو، دوای پێشكه‌شكردنی پوخته‌یه‌ك ده‌رباره‌ی كار و چالاكییه‌كانی هاوپه‌یمانان له ناوچه‌كه، هه‌ردوولا له‌سه‌ر به‌رده‌وامیی مه‌ترسی و هه‌ڕه‌شه‌كانی داعش له عێراق و ناوچه‌كه هاوڕا بوون و پێویستیی هه‌ماهه‌نگی و هاوكاریی هاوپه‌یمانان له‌گه‌ڵ سوپای عێراق و پێشمه‌رگه بۆ ڕووبه‌ڕووبوونه‌وه‌ی مه‌ترسییه‌كان، دووپات كرایه‌وه.
له به‌شێكی دیكه‌ی كۆبوونه‌وه‌كه‌دا دوایین هه‌نگاو و پێشهاته‌كانی پرۆسه‌ی چاکسازیی وه‌زاره‌تی پێشمه‌رگه باس كرا. له‌مباره‌یه‌وه هه‌ردوولا جه‌ختیان له پێویستی به‌رده‌وامیی پرۆسه‌که كرده‌وه و پاڵپشتیی خۆیان بۆ هه‌نگاوه‌کانی، ده‌ربڕی.
تاوتوێكردنی چه‌ند بابه‌تێكی دیکه‌ی په‌یوه‌ست به دۆخی ناوچه‌كه و جێی بایه‌خی هاوبه‌ش، لایه‌نێكی دیكه‌ی كۆبوونه‌وه‌كه بوو.
